जळगाव, (प्रतिनिधी) : मोबाईल आणि सोशल मीडियाच्या वाढत्या प्रभावामुळे विद्यार्थ्यांमध्ये वाचनाची सवय कमी होत असताना, वाचन संस्कृती रुजविण्याच्या उद्देशाने गांधी रिसर्च फाऊंडेशन यांच्या वतीने आयोजित युवा संस्कार व व्यक्तिमत्त्व विकास शिबिरात ‘रोटरी वाचन कट्टा’ या उपक्रमाचे आयोजन करण्यात आले. विटनेर येथील डॉ. निलेश (जैन) ब्रह्मेचा माध्यमिक विद्यालय येथे झालेल्या या उपक्रमात ३८ शिबिरार्थींनी श्यामची आई या प्रेरणादायी पुस्तकाचे सामुहिक वाचन केले.
कार्यक्रमाच्या सुरुवातीला एका शिबिरार्थ्याने साने गुरुजी यांच्या जीवनकार्याची माहिती सांगितली. त्यानंतर प्रत्येक विद्यार्थ्याने ‘श्यामची आई’ मधील एक परिच्छेद वाचून दाखवत पुस्तकातील संस्कार, प्रेम, त्याग आणि माणुसकीचे विचार अनुभवले.
यावेळी रोटरी क्लब जळगावचे अध्यक्ष गिरीश कुळकर्णी यांनी विद्यार्थ्यांना वाचनाचे महत्त्व पटवून दिले. “वाचाल तर वाचाल” या उक्तीचा संदर्भ देत त्यांनी सांगितले की, वाचनामुळे विचारांची प्रगल्भता वाढते, आत्मविश्वास निर्माण होतो आणि व्यक्तिमत्त्व समृद्ध होते. पुस्तके ही माणसाची खरी मित्र असून चांगले साहित्य विद्यार्थ्यांना योग्य दिशा देण्याचे कार्य करते, असेही त्यांनी नमूद केले.
या प्रसंगी ज्येष्ठ गांधीयन अब्दुलभाई, अर्जुन प्रसाद, प्रशांत सुर्यवंशी, विक्रम अस्वार, मयूर गिरासे, चंद्रकांत चौधरी आदींची उपस्थिती होती. याप्रसंगी संकल्प चांगला माणूस बनण्याचा पुस्तकांचे वितरण करण्यात आले. पुस्तकांद्वारे संस्कार आणि जीवनमूल्ये जपण्याचा संदेश उपक्रमातून देण्यात आला.
