जळगाव, (प्रतिनिधी) : एक लाख रुपयांची लाच घेताना रंगेहात पकडण्यात आलेल्या पोलीस नाईकाला पोलीस सेवेतून बडतर्फ करण्यात आले आहे. जिल्हा पोलीस अधीक्षक डॉ. महेश्वर रेड्डी यांनी गुरुवारी हे कठोर पाऊल उचलले. यासोबतच, या प्रकरणाची गांभीर्याने दखल घेत शनिपेठ पोलीस ठाण्याच्या पोलीस निरीक्षकांनाही तडकाफडकी नियंत्रण कक्षात जमा (कंट्रोल जमा) करण्याचे आदेश देण्यात आले आहेत.
शनिपेठ पोलीस ठाण्यात कार्यरत असलेले पोलीस नाईक विनोद पितांबर अहिरे याला काही दिवसांपूर्वी लाचलुचपत प्रतिबंधक विभागाने (ACB) सापळा रचून पकडले होते. एका तक्रारदाराकडून एक लाख रुपयांची लाच स्वीकारताना त्याला रंगेहात अटक करण्यात आली होती. या कारवाईमुळे पोलीस दलात मोठी खळबळ माजली होती.
अखेर बडतर्फीची कारवाई..
लाचलुचपत प्रतिबंधक विभागाच्या कारवाईनंतर विनोद अहिरे याच्यावर विभागीय स्तरावर कोणती कारवाई होणार, याकडे सर्वांचे लक्ष लागले होते. अखेर १६ एप्रिल रोजी जिल्हा पोलीस अधीक्षक डॉ. महेश्वर रेड्डी यांनी कायदेशीर अधिकारांचा वापर करत अहिरे याला पोलीस प्रशासनातून बडतर्फ (Dismiss) करण्याचे आदेश निर्गमित केले.
केवळ लाच घेणाऱ्या कर्मचाऱ्यावरच नव्हे, तर संबंधित पोलीस ठाण्याच्या प्रमुखावरही प्रशासनाने कारवाईचा बडगा उगारला आहे. शनिपेठ पोलीस ठाण्याच्या पोलीस निरीक्षक कावेरी कमलाकर यांची तडकाफडकी नियंत्रण कक्षात बदली करण्यात आली आहे. या कारवाईमुळे जळगाव पोलीस दलातील लाचखोर प्रवृत्तीच्या कर्मचाऱ्यांचे धाबे दणाणले आहेत.
”भ्रष्टाचाराच्या बाबतीत ‘झिरो टॉलरन्स’ धोरण राबवले जात असून, कोणत्याही प्रकारची शिस्तभंग किंवा गैरप्रकार खपवून घेतला जाणार नाही,” असा कडक संदेश या कारवाईतून पोलीस अधीक्षकांनी दिला आहे.
