जळगाव, (प्रतिनिधी) : जळगाव शहर महानगरपालिकेतील रिक्त असलेल्या ७ स्वीकृत नगरसेवक पदांसाठी आज, बुधवारी (१५ एप्रिल) विशेष महासभेचे आयोजन करण्यात आले होते. या सभेत सर्वपक्षीय ७ उमेदवारांची एकमताने (बिनविरोध) निवड करण्यात आली आहे. निवडीची घोषणा होताच महापालिका प्रशासकीय इमारतीच्या प्रांगणात कार्यकर्त्यांनी ढोल-ताशांच्या गजरात आणि गुलालाची उधळण करत जोरदार जल्लोष केला.
पक्षनिहाय निवड झालेले उमेदवार..
पीठासीन अधिकारी तथा महापौर दीपमाला काळे यांनी नवनियुक्त स्वीकृत नगरसेवकांच्या नावांची अधिकृत घोषणा केली. यामध्ये प्रामुख्याने भारतीय जनता पक्षाचे वर्चस्व दिसून आले.
भारतीय जनता पक्ष (४ जागा): डॉ. राधेश्याम चौधरी, रमेश मतानी, प्रदीप रोटे आणि सुभाष शौचे.
शिवसेना – शिंदे गट (२ जागा): हर्षल मावळे आणि नरेंद्र आत्माराम पाटील.
शिवसेना – ठाकरे गट (१ जागा): शरद तायडे (महानगरप्रमुख).
महापालिकेतील नवे पक्षीय बलाबल..
या निवडीनंतर जळगाव महानगरपालिकेतील नगरसेवकांची एकूण संख्या आता ८२ झाली आहे. या नवीन नियुक्त्यांमुळे राजकीय समीकरणे खालीलप्रमाणे बदलली आहेत:
भाजप: ४६ वरून ५० नगरसेवक.
शिवसेना (शिंदे गट): संख्या २५ वर.
शिवसेना (ठाकरे गट): संख्या ७ वर पोहोचली आहे.
खेळीमेळीच्या वातावरणात निवड प्रक्रिया..
निवडीनंतर महापौर दीपमाला काळे आणि उपमहापौर मनोज चौधरी यांनी नवनियुक्त सदस्यांना पुष्पगुच्छ देऊन शुभेच्छा दिल्या. यावेळी स्थायी समिती सभापती डॉ. चंद्रशेखर पाटील, महानगरपालिका आयुक्त ज्ञानेश्वर ढेरे, नगर सचिव सतीश शुक्ला यांच्यासह विविध विभागांचे अधिकारी आणि नगरसेवक उपस्थित होते. संपूर्ण निवड प्रक्रिया अत्यंत खेळीमेळीच्या वातावरणात पार पडली.
विजयाचा जल्लोष..
महासभा संपल्यानंतर नवनियुक्त नगरसेवकांच्या समर्थकांनी महापालिका परिसरात मोठी गर्दी केली होती. ‘एकच जल्लोष’ करत कार्यकर्त्यांनी फटाक्यांची आतिशबाजी केली. यावेळी माध्यमांशी बोलताना नवनियुक्त सदस्यांनी “जळगाव शहराच्या विकासासाठी आम्ही कटिबद्ध आहोत,” असा विश्वास व्यक्त केला.
