जळगाव, (प्रतिनिधी) : जळगाव विभागाच्या अपर पोलीस अधीक्षक पदावर संदीप गावीत यांची पदोन्नतीने नियुक्ती करण्यात आली आहे. या संदर्भातील अधिकृत आदेश शुक्रवारी (१० एप्रिल) निर्गमित झाले असून, गावीत लवकरच आपला पदभार स्वीकारतील.
संदीप गावीत हे यापूर्वी भुसावळ येथे उपविभागीय पोलीस अधिकारी (SDPO) म्हणून कार्यरत होते. त्यांच्या कामाची दखल घेत त्यांना पदोन्नती देण्यात आली आहे. पदोन्नती जाहीर झाली असली तरी नियुक्तीचे आदेश प्रलंबित असल्याने ते काही काळ प्रतीक्षेत होते. अखेर काल यावर शिक्कामोर्तब झाले.
सध्या या पदावर असलेले अशोक नखाते यांच्या पुढील नियुक्तीचे आदेश अद्याप आलेले नाहीत, त्यामुळे ते सध्या वेटिंगवर (प्रतीक्षेत) आहेत. संदीप गावीत आता जळगाव जिल्ह्याचे नवीन अपर पोलीस अधीक्षक म्हणून कायदा व सुव्यवस्थेची जबाबदारी सांभाळणार आहेत.
