जळगाव, (प्रतिनिधी) : एलपीजी गॅसची झालेली प्रचंड दरवाढ, कृत्रिम टंचाई आणि रिक्षा चालक कल्याणकारी मंडळाची जाचक नोंदणी फी यांविरुद्ध बुधवारी जळगाव जिल्हाधिकारी कार्यालयासमोर रिक्षा चालकांनी जोरदार निदर्शने केली. ‘ऑटो रिक्षा चालक मालक संघटना संयुक्त कृती समिती, महाराष्ट्र राज्य’ च्या वतीने पुकारलेल्या या राज्यव्यापी आंदोलनांतर्गत जळगावात हे यशस्वी आंदोलन करण्यात आले.
यावेळी मागण्यांचे लेखी निवेदन उपजिल्हाधिकारी तथा अप्पर जिल्हादंडाधिकारी वैशाली चव्हाण यांना देण्यात आले. मागण्यांचा योग्य पाठपुरावा करण्याचे आश्वासन प्रशासनाकडून देण्यात आले असले तरी, मागण्या मान्य न झाल्यास संपूर्ण राज्यात बेमुदत बंद पुकारून ‘चक्का जाम’ केला जाईल, असा इशारा प्रदेश कार्याध्यक्ष प्रल्हाद सोनवणे यांनी दिला आहे.
गॅस वितरकांकडून लूट: ५५ रुपयांचा गॅस १५० रुपयांना!
आखाती युद्धाच्या पार्श्वभूमीवर इंधनाचा तुटवडा असल्याचे भासवून शहरातील एलपीजी वितरक रिक्षा चालकांची आर्थिक लूट करत असल्याचा आरोप यावेळी करण्यात आला. ५५ रुपये लिटर असलेला गॅस चक्क १२५ ते १५० रुपये दराने विकला जात आहे. अनेक पंप जाणीवपूर्वक बंद ठेवले जात असल्याने रिक्षा चालकांवर उपासमारीची वेळ आली आहे. या गैरप्रकाराबाबत जिल्हा पुरवठा अधिकारी अर्चना मोरे यांच्याशी चर्चा करून दोषी वितरकांवर कडक कारवाई करण्याची मागणी करण्यात आली.
कल्याणकारी मंडळाच्या जाचक अटींना विरोध..
शासनाने स्थापन केलेल्या ‘धर्मवीर आनंद दिघे ऑटो रिक्षा व मीटर टॅक्सी कल्याणकारी मंडळा’च्या नोंदणी प्रक्रियेवरही संघटनांनी आक्षेप घेतला आहे. ५०० रुपये प्रवेश फी आणि ३०० रुपये वार्षिक फी रद्द करावी. तसेच मंडळाची नोंदणी केल्याशिवाय परमिट नूतनीकरण किंवा पासिंग केले जात नाही, ही आरटीओची सक्ती बेकायदेशीर असून ती त्वरित थांबवावी.
प्रमुख संघटनांची एकजूट..
हे आंदोलन प्रदेश अध्यक्ष शशांक राव आणि सरचिटणीस विलास भालेकर यांच्या मार्गदर्शनाखाली झाले. जळगावात प्रल्हाद सोनवणे, राजू मोरे, रज्जाक खान आणि प्रमोद वाणी यांच्या नेतृत्वाखाली विविध संघटनांचे प्रतिनिधी मोठ्या संख्येने सहभागी झाले होते. या आंदोलनात सुनील जाधव, राजू जयस्वाल, शांताराम अहिरे, ॲड. गोविंद तिवारी, देविदास भडंगर, सुरसिंग पाटील, जब्बार शेख, सय्यद सरताज, अमृत बारी, सुरेश वाघ, योगेश बाविस्कर, अशपाक शहा, जे. डी. भालेराव, राजेंद्र कोळी यांच्यासह शेकडो रिक्षा चालक व मालक उपस्थित होते.
