जळगाव, (प्रतिनिधी) : प्रभू श्रीरामचंद्र यांच्या जन्मोत्सवाचे औचित्य साधून जळगाव शहरात गुरुवारी (दि.२६) भक्ती आणि उत्साहाचा महापूर ओसांडून वाहिला. ‘सार्वजनिक श्रीराम जन्मोत्सव समिती, जळगाव महानगर’ तर्फे आयोजित भव्य शोभायात्रेने अवघी सुवर्णनगरी ‘राममय’ झाली होती. ‘जय श्रीराम’च्या जयघोषाने आसमंत दुमदुमले होते, तर ढोल-ताशांच्या गजराने शहरात चैतन्याचे वातावरण निर्माण झाले होते.
महाआरतीने सोहळ्याचा शंखनाद..
शोभायात्रेचा प्रारंभ गोलाणी मार्केट येथील हनुमान मंदिरात अत्यंत भक्तिमय वातावरणात झाला. उपस्थित मान्यवरांच्या हस्ते प्रभू श्रीराम आणि हनुमान रायाची महाआरती करण्यात आली. आरतीनंतर ढोल-ताशांच्या कडकडाटात आणि शंखनादात शोभायात्रेला सुरुवात झाली. गोलाणी मार्केटपासून निघालेली ही रॅली शहरातील प्रमुख मार्गांवरून मार्गस्थ होताना ठिकठिकाणी भाविकांनी फुलांची उधळण करून स्वागत केले.
वेशभूषा आणि पारंपरिक संस्कृतीचे दर्शन..
यावर्षीच्या शोभायात्रेचे मुख्य आकर्षण शालेय विद्यार्थ्यांचा सहभाग ठरला. पौराणिक आणि ऐतिहासिक वेशभूषा करून सहभागी झालेल्या विद्यार्थ्यांनी उपस्थितांचे लक्ष वेधून घेतले. महिलांनी नऊवारी साड्या आणि पुरुषांनी पारंपरिक फेटे परिधान करून मिरवणुकीची शोभा वाढवली. हातात भगवे ध्वज आणि ओठांवर ‘राम नाम’चा जप करत तरुणाईने मोठ्या संख्येने या जल्लोषात सहभाग नोंदवला.
या सोहळ्यात राजकीय, सामाजिक आणि प्रशासकीय क्षेत्रातील अनेक मान्यवरांनी उपस्थित राहून प्रभू श्रीरामाचे दर्शन घेतले. यावेळी प्रामुख्याने आ. राजूमामा भोळे यांच्यासह विविध क्षेत्रातील मान्यवरांची उपस्थिती लक्षणीय होती. ”जळगावकरांच्या एकजुटीचे आणि भक्तीचे दर्शन या शोभायात्रेतून घडले आहे. संपूर्ण शहर प्रभू रामाच्या रंगात न्हाऊन निघाले.”
चोख बंदोबस्त आणि सेवाभावी उपक्रम..
शोभायात्रा निर्विघ्नपणे पार पडावी यासाठी पोलीस प्रशासनातर्फे शहरात चोख बंदोबस्त तैनात करण्यात आला होता. रॅलीच्या मार्गावर ठिकठिकाणी आकर्षक स्वागत कमानी उभारण्यात आल्या होत्या. तसेच, विविध सामाजिक संस्थांनी भाविकांसाठी पिण्याचे पाणी आणि अल्पोपहाराची सोय केली होती. सायंकाळी उशिरापर्यंत चाललेल्या या अभूतपूर्व सोहळ्याने जळगावकरांच्या डोळ्यांचे पारणे फेडले.
