जळगाव, (प्रतिनिधी) : बुऱ्हाणपूर येथील मसाला व्यापाऱ्याच्या कर्मचाऱ्यांना अडवून ८ लाख रुपयांची बॅग लुटणाऱ्या टोळीचा रावेर पोलिसांनी छडा लावला आहे. गुन्हे शोध पथकाने अत्यंत शिताफीने तपास करत ७ संशयित आरोपींना अटक केली असून, त्यांच्याकडून रोख रक्कम आणि दुचाकी असा एकूण ३ लाख ५० हजार रुपयांचा मुद्देमाल जप्त केला आहे.
बुऱ्हाणपूर येथील मसाला व्यापारी दीपक सुरेश धर्माणी यांचे कर्मचारी गौरव वाघ आणि तौफिक तेली हे दि.६ फेब्रुवारी २०२६ रोजी सावदा, फैजपूर आणि रावेर परिसरातून वसुली करून परतत होते. रात्री ९ वाजेच्या सुमारास खानापूर आरटीओ बॅरेलजवळ ८ ते ९ अज्ञात इसमांनी त्यांची दुचाकी अडवून पैशांची बॅग हिसकावून नेली होती. याप्रकरणी रावेर पोलीस स्टेशनला गुन्हा दाखल करण्यात आला होता.
गुन्ह्याचे गांभीर्य ओळखून पोलीस निरीक्षक डॉ. विशाल जयस्वाल यांनी तातडीने गुन्हे शोध पथकाला तपासाचे आदेश दिले. घटनास्थळी अंधार असल्याने आणि सीसीटीव्हीमध्ये चेहरे स्पष्ट दिसत नसल्याने तपासात अडचणी येत होत्या. पोलिसांनी रावेर, सावदा आणि फैजपूर परिसरातील तब्बल ६७ सीसीटीव्ही फुटेज तपासले. खबऱ्यांकडून मिळालेल्या गोपनीय माहितीच्या आधारे पोलिसांनी संशयितांना ताब्यात घेऊन चौकशी केली असता त्यांनी गुन्ह्याची कबुली दिली.
अटक करण्यात आलेल्या संशयीतांमध्ये फारुख शेख रईस ( वय १९), अत्ताउल्लाह खान दाउद खान ऊर्फ सोनू, शेख सईद शेख कादर ऊर्फ सुपडू, शेख समीर शेख कलीम ऊर्फ विकू, राहील खान दाउद खान, रहेमान खान अय्युब खान ऊर्फ भुन्ऱ्या, अक्रम खान इस्माईल खान (सर्व रा. बंडू चौक, रावेर) यांचा समावेश आहे.
या गुन्ह्यातील मुख्य आरोपी आणि सराईत गुन्हेगार शेख हसन शेख अफजल ऊर्फ हसन फावड्या (रा. रुस्तम चौक) हा पोलिसांचा सुगावा लागताच फरार झाला आहे. पोलीस त्याचा कसून शोध घेत आहेत. अटक करण्यात आलेल्या आरोपींकडून ९५ हजार रुपये किमतीच्या दोन मोटार सायकली आणि २ लाख ५५ हजार रुपये रोख जप्त करण्यात आले आहेत. न्यायालयाने आरोपींना २६ फेब्रुवारीपर्यंत पोलीस कोठडी सुनावली आहे.
ही कारवाई जळगाव जिल्हा पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, डीवायएसपी अनिल बडगुजर यांच्या मार्गदर्शनाखाली पो.नि. डॉ. विशाल जयस्वाल, पीएसआय तुषार पाटील आणि रावेर गुन्हे शोध पथकातील सुनील वंजारी, कल्पेश आमोदकर, श्रीकांत चव्हाण व सहकाऱ्यांनी केली आहे.
