जळगाव, (प्रतिनिधी) : स्वच्छतेला दैनंदिन जीवनाचा भाग बनवण्यावर भर देत श्री संत ज्ञानेश्वर प्राथमिक व माध्यमिक विद्यालयाने गणेश चतुर्थीच्या निमित्ताने ‘स्वच्छता म्हणजे रोजचा सण, नाहीतर कायमचे आजारपण’ हा महत्त्वपूर्ण संदेश दिला. विद्यार्थ्यांमध्ये पर्यावरणपूरक सवयी रुजवण्यासाठी विद्यालयाच्या ‘इको क्लब’ तर्फे अनेक उपक्रम राबवण्यात येत आहेत.
शाळेतील चिमुकल्या विद्यार्थ्यांच्या हस्ते गणेशमूर्तीची स्थापना करण्यात आली. या वेळी शाळा व्यवस्थापन समिती, पालक-शिक्षक संघ आणि माता-पालक संघटनेच्या सदस्यांच्या हस्ते पहिली आरती करून या उपक्रमाचा शुभारंभ करण्यात आला. पर्यावरणाविषयी जागरूकता वाढवण्यासाठी विद्यार्थ्यांनी विविध घोषवाक्ये तयार केली होती. यात प्रामुख्याने वृक्षारोपण, शौचालयाचा योग्य वापर, कचराकुंड्यांचा वापर आणि प्लास्टिकला पर्याय म्हणून कापडी पिशव्यांचा वापर करण्यावर भर देण्यात आला.
विद्यालयाने विद्यार्थ्यांच्या घरांतून येणाऱ्या निर्माल्यासाठी एक मोठी कचरापेटी शाळेत ठेवली आहे. विसर्जन झाल्यावर या निर्माल्यापासून सेंद्रिय खत तयार केले जाईल आणि त्याचा वापर शाळेतील परसबागेत केला जाईल, असे शाळेचे मुख्याध्यापक मुकेश नाईक यांनी सांगितले. अशा उपक्रमांमुळे विद्यार्थी लहानपणापासूनच पर्यावरणाची काळजी घेण्यास शिकतील, अशी आशा त्यांनी व्यक्त केली.
या वेळी विद्यार्थ्यांनी नृत्याचे सादरीकरण करून गणेशोत्सवाचा आनंद द्विगुणीत केला. विद्यार्थ्यांचा उत्साह आणि इको क्लबचा हा उपक्रम निश्चितच कौतुकास्पद असून, समाजासाठी एक आदर्श उदाहरण आहे.
