कॅफे चालकावर गुन्हा दाखल
जळगाव, (प्रतिनिधी) : शहरात कॉफी शॉपच्या नावाखाली सुरू असलेल्या एका अवैध कॅफेचा रामानंद नगर पोलिसांनी पर्दाफाश केला आहे. या कॅफेमध्ये पडदे लावून केलेल्या छोट्या कंपार्टमेंटमध्ये शाळकरी व महाविद्यालयीन मुले-मुली अश्लील चाळे करत असताना पोलिसांच्या पथकाने त्यांना रंगेहाथ पकडले. पोलिसांनी एकूण ७ जोडप्यांना ताब्यात घेऊन त्यांच्या पालकांना बोलावून समज दिली. या प्रकरणी कॅफे चालकावर गुन्हा दाखल करण्यात आला आहे.
जामनेर येथे नुकत्याच झालेल्या घटनेच्या पार्श्वभूमीवर, पोलीस निरीक्षक राजेंद्र गुंजाळ यांनी रामानंद नगर पोलीस ठाण्याच्या हद्दीतील कॅफे तपासण्याचे आदेश दिले होते. त्यानुसार गुन्हे शोध पथकाने रामानंद नगर पोलीस ठाण्याच्या हद्दीतील आस्वाद चौकाजवळ असलेल्या ‘कॅफे कॉलेज कट्टा’ या ठिकाणी अचानक छापा टाकला. छाप्यादरम्यान, कॅफेमध्ये ३x३ फुटांचे आणि ५ फूट उंचीचे प्लायवुडचे छोटे कप्पे तयार केलेले आढळले. त्यांना बाहेरून पडदे लावलेले होते आणि आतमध्ये बसण्यासाठी सोफे ठेवले होते. पोलिसांनी छापा टाकला तेव्हा या कप्प्यांमध्ये ७ जोडपी अश्लील चाळे करत होती. पोलिसांनी त्यांना बाहेर बोलावून माहिती घेतली आणि त्यांच्या पालकांना बोलावून समज दिली.
पोलिसांनी केलेल्या तपासणीत, या कॅफेमध्ये कॉफी बनवण्यासाठी लागणारे कोणतेही साहित्य किंवा परवाना आढळला नाही. यावरून हा कॅफे केवळ अश्लील कृत्यांसाठी जागा उपलब्ध करून देण्यासाठी चालवला जात असल्याचे स्पष्ट झाले. या प्रकरणी, मुकेश वसंत चव्हाण (वय ३०) या कॅफे चालकाविरुद्ध रामानंद नगर पोलीस ठाण्यात गुन्हा दाखल करण्यात आला आहे. पुढील तपास पोलीस हवालदार जितेंद्र राठोड करत आहेत.
ही कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते, आणि उपविभागीय पोलीस अधिकारी संदीप गावीत यांच्या मार्गदर्शनाखाली पोलीस निरीक्षक राजेंद्र गुंजाळ यांच्या नेतृत्वाखाली करण्यात आली. या पथकात पोलिस उपनिरीक्षक सचिन रणशेवरे, पोलीस हवालदार सुधाकर अंभोरे, जितेंद्र राजपूत, जितेंद्र राठोड, सुशील चौधरी, पोलीस नाईक योगेश बारी, मनोज सुरवाडे, रेवानंद साळुंखे, अतुल चौधरी, विनोद सूर्यवंशी, आणि महिला पोलीस स्वाती पाटील यांचा सहभाग होता.
