यावल, (प्रतिनिधी) : तालुक्यातील किनगाव गावातील यावल रस्त्यावर असलेल्या हॉटेल मनमंदिर लॉजिंगमध्ये वेश्या व्यवसायावर पोलिसांनी धाड टाकून महिलेची सुटका करून तिघांविरोधात यावल पोलीस स्टेशनला गुन्हा दाखल करण्यात आला. यामुळे यावल तालुक्यात खळबळ उडाली आहे.
यावल पोलीस ठाण्याचे पोलीस निरीक्षक रंगनाथ धारबळे यांना मिळालेल्या माहितीनुसार यावल-चोपडा रस्त्यावर किनगाव शिवारात मनमंदिर बारमध्ये वेश्याव्यवसाय सुरु असल्याचे समजले होते. पोलीस निरीक्षक यांनी त्याठिकाणी कारवाई करण्यासाठी सापळा रचला. बनावट ग्राहक आणि पंच पाठवून त्यांनी अगोदर याबाबत खात्री केली. गुरुवारी सायंकाळी ५.३० वाजेच्या सुमारास बनावट ग्राहक हॉटेलमध्ये पोहचला. वेश्या व्यवसायाची खात्री झाल्यावर ठरलेल्या नोटा त्याने काउंटरवर दिल्या. हॉटेलच्या तिसऱ्या माळ्यावर खोलीत हा धंदा सुरु होता. बनावट ग्राहकाने निरीक्षक रंगनाथ धारबळे यांना मोबाईलवर मिस कॉल देताच ते पथकासह त्याठिकाणी पोहचले. यावेळी त्यांच्यासोबत हवालदार वासुदेव मराठे, अमित तडवी, सागर कोळी, एजाज गवळी, भारत कोळी, मिनाक्षी तडवी, अल्लाउद्दीन तडवी हे देखील होते.
हॉटेलमधील तिघांना ताब्यात घेत पोलिसांनी एका पीडित महिलेची सुटका केली. या प्रकरणी यावल पोलिसात हवालदार वासुदेव मराठे यांच्या फिर्यादीवरून गोपाळ निंबा पाटील (वय २८,रा.दहिगाव), पराग प्रकाश लोहार (वय २४, रा. खेडी खुर्द ता.जळगाव) व समाधान शालिक तायडे (वय २२, रा.साकळी) या तिघांविरुद्ध गुन्हा दाखल करण्यात आला. घटनास्थळावरून मोबाईल, रोकड आणि इतर साहित्य जप्त करण्यात आले. पुढील तपास पोलिस उपनिरीक्षक सुनील मोरे करीत आहेत.
