जळगाव, (प्रतिनिधी) : शहरातील रिंगरोडवरील आर्ट गॅलरीमध्ये सानिका भन्साळी यांच्या चित्रांच्या प्रदर्शनाचे जैन उद्योग समूहाचे अध्यक्ष अशोक जैन यांच्या हस्ते मोठ्या उत्साहात उद्घाटन झाले. सानिकाची चित्रे मनाला प्रसन्न करणारी असून त्यामध्ये भाव, रंग आणि रेषांचे वैशिष्ट्य दिसून येते, असे मत अशोक जैन यांनी यावेळी व्यक्त केले.
याप्रसंगी ज्येष्ठ रंगकर्मी व परिवर्तन अध्यक्ष शंभू पाटील, अनिल कांकरिया, किड्स ग्रुपच्या प्रिन्सिपल मीनल जैन, चित्रकार सचिन मुसळे आणि इतर मान्यवर उपस्थित होते. शंभू पाटील यांनी सानिकाच्या प्रदर्शनाला “नव्या पिढीच्या मनात असलेल्या भावभावनांचे प्रदर्शन” असे संबोधले. सानिकाने वापरलेले रंग आणि शोधलेले आकार तिच्यातील उत्तम कलावंताची ओळख करून देतात, असेही ते म्हणाले.
किड्स ग्रुपच्या प्रिन्सिपल मीनल जैन यांनी सानिकाच्या लहानपणापासूनच्या चित्रकलेच्या गुणांबद्दल अभिमान व्यक्त केला आणि इतके चांगले प्रदर्शन आयोजित केल्याबद्दल आनंद व्यक्त केला. सानिकाचे आजोबा विजयकुमार भन्साळी यांनी तिच्या कलेच्या आवडीची सुरुवात घरातील भिंतीवरील चित्रांपासून झाल्याचे सांगितले. उद्योजक अनिल कांकरिया यांनी जळगाव ही अभिनव व कल्पक कलावंतांची भूमी बनत असून असे नवे कलावंत आकाराला येणे हे शहर सुंदर बनत असल्याचे लक्षण असल्याचे मत व्यक्त केले.
या उद्घाटनप्रसंगी चित्रकलेवर प्रेम करणारे अनेक कलावंत उपस्थित होते. कार्यक्रमाचे सूत्रसंचालन हर्षल पाटील यांनी केले, तर आभारप्रदर्शन चित्रकार सानिका भन्साळी यांनी केले. हे चित्र प्रदर्शन ३० जूनपर्यंत पुना रिंगरोडवरील आर्ट गॅलरीमध्ये असणार असून, चित्रप्रेमींनी या प्रदर्शनाला आवर्जून भेट द्यावी, असे आवाहन आयोजकांनी केले आहे. कार्यक्रमाच्या यशस्वीतेसाठी गौरव भन्साळी आणि नेहा भन्साळी यांनी विशेष परिश्रम घेतले.
