भडगाव, (प्रतिनिधी) : तब्बल चार महिन्यांच्या प्रतीक्षेनंतर कजगाव रेल्वे स्थानकावर बडनेरा-नाशिकरोड एक्स्प्रेसला अखेर थांबा मिळाला आहे. गुरुवार, ११ जून रोजी, या गाडीच्या आगमनाचे स्वागत करण्यासाठी खासदार स्मिता वाघ, माजी आमदार दिलीप वाघ यांच्यासह शेकडो ग्रामस्थ उपस्थित होते.
गेल्या चार महिन्यांपासून या गाडीला थांबा जाहीर झाला होता, परंतु प्रत्यक्षात ती थांबत नसल्याने स्थानिकांमध्ये मोठी नाराजी होती. अखेर ११ जूनपासून गाडीला प्रत्यक्ष थांबा मिळाल्याने कजगाव आणि पंचक्रोशीतील प्रवाशांमध्ये समाधानाचे वातावरण आहे. यामुळे कजगाव परिसरातील शेकडो प्रवाशांना मोठा फायदा होणार आहे.
यावेळी खासदार स्मिता वाघ, माजी आमदार दिलीप वाघ, रेल्वेचे डिव्हिजन मॅनेजर भानुदास तपस्वी, ऑपरेटिंग मॅनेजर शंभू शरणसिंग, स्टेशन अधीक्षक बी.एस. मीना, कमर्शियल इन्स्पेक्टर चंद्रकांत काळे, कजगावचे सरपंच रघुनाथ महाजन, भाजपाचे अमोल पाटील, मधुकर काटे, शिवसेनेचे अनिल महाजन, समाधान पाटील, गोंडगावचे सरपंच राहुल पाटील, भोरटेकचे उपसरपंच उमेश देशमुख, नंदू सोमवंशी, योगेश सूर्यवंशी तसेच कजगाव, गोंडगाव, भोरटेक, निंभोरा, कनाशी, खाजोळा, पिंपरी, पासर्डी, कोठली, गुढे, तांदुळवाडी, मळगाव आणि परिसरातील असंख्य गावातील नागरिक मोठ्या संख्येने उपस्थित होते.
खासदारांसमोर नागरिकांनी मांडल्या समस्या..
रेल्वेच्या विशेष कार्यक्रमासाठी पहिल्यांदाच कजगाव येथे आलेल्या खासदार स्मिता वाघ यांच्यासमोर कजगाव आणि परिसरातील ग्रामस्थांनी समस्या मांडल्या. यामध्ये रेल्वे स्थानक परिसरातील नागरिकांना दुसऱ्या बाजूला ये-जा करण्यासाठी येणारी अडचण, विद्यार्थ्यांना शिक्षणासाठी रेल्वे रहदारीमुळे होणारी गैरसोय, चुकीच्या ठिकाणी लावलेली तिकीट खिडकी, कजगावच्या जुन्या हायस्कूलजवळील पुलाखाली साचणारे पाणी, भोरटेकच्या बोगद्याची अडचण अशा अनेक समस्या नागरिकांनी खासदारांसमोर मांडल्या. खा. स्मिता वाघ यांनी सर्वांच्या अडचणी समजून घेतल्या आणि येत्या आठ दिवसांत त्यावर तोडगा काढणार असल्याचे आश्वासन नागरिकांना दिले. यावेळी गावातील ग्रामस्थ आणि महिला मोठ्या संख्येने उपस्थित होत्या.
