जळगाव, (प्रतिनिधी) : जळगाव शहराला आज बुधवारी पहाटे भीषण अपघाताने हादरवून सोडले. निमखेडी शिवारात पहाटे ३ ते ४ वाजण्याच्या सुमारास एका अवजड वाहनाने रिक्षाला दिलेल्या जोरदार धडकेत दोन सख्ख्या भावांचा जागीच मृत्यू झाला. या घटनेमुळे शिवदे कुटुंबावर दु:खाचा डोंगर कोसळला असून, शहरात हळहळ व्यक्त केली जात आहे.
मृतांमध्ये शिवसेना (शिंदे गट) महिला शहर प्रमुख ज्योती शिवदे यांचे पती ज्ञानेश्वर झगडू शिवदे आणि दीर प्रमोद दगडू शिवदे यांचा समावेश आहे. मिळालेल्या माहितीनुसार, ज्ञानेश्वर आणि प्रमोद हे दोघेही पाणीपुरी विक्रीचा व्यवसाय करत होते. दररोजप्रमाणे पाणीपुरीचा माल तयार करण्यासाठी ते शिवाजीनगर येथील जुन्या घरी जात असताना, निमखेडी येथील कांताई नेत्रालयाजवळ एका अज्ञात वाहनाने त्यांच्या रिक्षाला धडक दिली. धडक इतकी भीषण होती की, दोघांचाही जागीच मृत्यू झाला.
अपघातानंतर अज्ञात वाहन चालक घटनास्थळावरून फरार झाला. मयतांचे मृतदेह शासकीय वैद्यकीय महाविद्यालय व रुग्णालयात उत्तरीय तपासणीसाठी नेण्यात आले. या दुःखद घटनेची माहिती मिळताच, त्यांच्या नातेवाईकांसह शिवसेनेच्या (शिंदे गट) कार्यकर्त्यांनी आणि विविध राजकीय पक्षाच्या कार्यकर्त्यांनी रुग्णालयात मोठी गर्दी केली होती. रुग्णालयात प्रचंड आक्रोश पाहायला मिळाला.
जळगाव तालुका पोलीस स्टेशनमध्ये या प्रकरणी गुन्हा दाखल करण्याचे काम सुरू होते. पोलीस धडक देणाऱ्या वाहनाचा तपास करण्यासाठी सीसीटीव्ही फुटेज तपासत आहेत. एकाच अपघातात दोन सख्ख्या भावांचा अकाली मृत्यू झाल्याने सर्वत्र हळहळ व्यक्त होत आहे.
