गजानन पाटील | अमळनेर, दि. 09 – तालुक्यातील कळमसरे येथे आरोग्यदूत ग्राम पंचायत सदस्य संदीप उर्फ शिवाजी राजपूत यांच्या पुढाकारातून, बंधन युवा व स्मितोदय फाउंडेशनच्या सहकार्याने गुरूवारी मोफत नेत्र तपासणी शिबिर घेण्यात आले. या शिबिरात परिसरातील बहुसंख्य गरजवंत रूग्णांनी लाभ घेतला.
माजी आमदार स्मिता वाघ यांच्या हस्ते या शिबीराचे उद्घाटन करण्यात आले. यावेळी माजी जिल्हा परिषद सदस्य ऍड.व्ही.आर. पाटील अध्यक्षस्थानी होते. मुंबई पुरस्कृत संदीप फाउंडेशन शारदा नेत्रालयचे डॉ.खावीद पिंजारी, डॉ.यामीन पिंजारी, डॉ.सत्यविर, हेमंत खैरनार, अमोल रणदिवे, योगेश कुलकर्णी यांच्या पथकाने उपस्थित रुग्णांची नेत्रतपासनी केली.
दरम्यान तपासणी शिबिरात कळमसरे सह परिसरातील सुमारे अडीचशेच्या वर रुग्णांनी लाभ घेतला. यात नेत्र तपासणी होऊन 150 जणांना नेत्रदोष असल्याने अशा रुग्णांना चष्मा नंबर देऊन औषधोपचार करण्यात आलेत. तर उर्वरीत 98 जणांना मोतीबिंदू असल्याचे निष्पन्न झाले.
आर्थिक दृष्ट्या कमकुवत असणाऱ्या गरजूंना धुळे येथील नामांकित रुग्णालयात पुढील शस्त्रक्रिया केली जाणार असल्याचे आयोजकांनी सांगितले. यावेळी ग्राम पंचायत सदस्य गणेश चौधरी, दिनकर चव्हाण, अरुण चौधरी, किरण पाटील आदी उपस्थित होते.
