जळगाव, (प्रतिनिधी) : स्थानिक गुन्हे शाखेने आज, मंगळवार, २७ मे रोजी दहशत माजवण्याच्या उद्देशाने गावठी कट्टा बाळगणाऱ्या एका व्यक्तीला ताब्यात घेतले. विशाल संजय पवार (रा. भिलाटी, मेहरूण, जळगाव) असे आरोपीचे नाव असून, त्याच्याकडून ३०,००० रुपये किमतीचा गावठी बनावटीचा पिस्तूल मॅक्झीनसह जप्त करण्यात आला आहे.
आज सायंकाळी वरिष्ठ पोलीस निरीक्षक बबन आव्हाड यांना माहिती मिळाली होती की, विशाल पवार हा मेहरूण भिलाटी येथील पाण्याच्या हौदाजवळ उभा असून, त्याच्याजवळ गावठी कट्टा आहे. ही माहिती मिळताच स्थानिक गुन्हे शाखेच्या पथकाने तात्काळ घटनास्थळी धाव घेतली आणि विशाल पवार याला ताब्यात घेतले. दरम्यान विशाल पवार याच्याविरोधात एमआयडीसी पोलीस स्टेशन, जळगाव येथे आर्म ॲक्ट अंतर्गत गुन्हा दाखल करण्यात आला आहे.
ही कारवाई पोलीस अधीक्षक डॉ. महेश्वर रेड्डी, अप्पर पोलीस अधीक्षक अशोक नखाते, आणि उपविभागीय पोलीस अधिकारी संदीप गावीत यांच्या मार्गदर्शनाखाली वरिष्ठ पोलीस निरीक्षक बबन आव्हाड, पोलीस उपनिरीक्षक शरद बागल, विजयसिंग पाटील, रवि नरवाडे, संजय हिवरकर, अतुल वंजारी, राजेश मेढे, पोहेकाॅ. हरिलाल पाटील, विजय दामोदर पाटील, अक्रम शेख, प्रविण भालेराव, किशोर पाटील, प्रदीप चवरे यांनी यशस्वीपणे पार पाडली.
