किरण चौधरी, जामनेर (प्रतिनिधी) : शहरातील जळगाव रोडवर गेल्या अनेक वर्षांपासून अतिक्रमण करून उभ्या असलेल्या टपऱ्यांवर अखेर आज शनिवारी प्रशासनाने बुलडोझर चालवत कारवाई केली. नगरपरिषद व पोलिस प्रशासनाच्या संयुक्त मोहिमेत हे अतिक्रमण हटवण्यात आले.
मुख्याधिकारी नितीन बागुल आणि पोलीस निरीक्षक मुरलीधर कासार यांच्या नेतृत्वाखाली ही धडक कारवाई राबवण्यात आली. आज सकाळपासूनच नगरपरिषद आणि पोलिसांचे पथक जळगाव रोडवर दाखल झाले होते. अतिक्रमण धारकांना नोटिसा बजावूनही अनेकांनी टपऱ्या हटवल्या नव्हत्या, त्यामुळे सकाळी बुलडोझरच्या सहाय्याने अतिक्रमण हटवण्याची मोहीम हाती घेण्यात आली. या कारवाईत नगरपरिषदेचे कर्मचारी, पोलिसांचा मोठा ताफा अधिकारी उपस्थित होते.
अतिक्रमण धारकांनी या कारवाईचा विरोध केला असून, त्यांनी त्यांच्या उदरनिर्वाहाचा प्रश्न उपस्थित केला आहे. तर दुसरीकडे, स्थानिक नागरिकांनी प्रशासनाच्या या कारवाईचे स्वागत केले असून, त्यामुळे रस्ता मोकळा होईल आणि वाहतुकीला अडथळा कमी होईल, असे मत व्यक्त केले. नगरपरिषद प्रशासनाने स्पष्ट केले आहे की, फक्त जळगाव रोडच नव्हे, तर शहरातील इतर मुख्य रस्त्यांवरील अतिक्रमण देखील हटवण्यात येईल. लवकरच वाकी रोड, भुसावळ रोड आणि पाचोरा रोडवरील अनधिकृत बांधकामे, टपऱ्या आणि हातगाड्यांवरही कारवाई करण्यात येणार असल्याचे नगरपरिषदेच्या अधिकाऱ्यांनी सांगितले.
