जळगाव, (प्रतिनिधी) : तालुक्यातील एका १७ वर्षीय अल्पवयीन तरुणीवर पळवून नेत तिच्यावर शिरसोली येथील जंगलात तसेच इंदोर शहरातील प्रीतमपुरा भागात बलात्कार करून तिचे अश्लील फोटो व व्हिडिओ काढत ते व्हायरल करण्याची नराधमाने धमकी दिली. तसेच तरुणीसह तिच्या आई-वडिलांना जीवे मारण्याची धमकी दिली. या प्रकरणी नराधमासह मुलीला पळवून नेण्यासाठी मदत करणाऱ्या त्याच्या तिघा मित्रांवर एमआयडीसी पोलीस स्टेशनला गुन्हा दाखल करण्यात आला आहे.
जळगाव तालुक्यात १७ वर्षीय तरुणी तिच्या परिवारासह राहते. दरम्यान मकर संक्रांतीच्या दिवशी दि.१४ ते २० जानेवारी दरम्यान संशयित आरोपी नितेश धनराज राठोड (रा. धानवड ता. जळगाव) याने तिच्याशी मैत्री करून नंतर तिचे मनाविरुद्ध जबरदस्तीने शारीरिक संबंध करून तिचा एकटीचा तसेच त्याचेसह अश्लील फोटो व व्हिडिओ काढून व्हायरल करण्याची धमकी दिली. यासोबत तरुणीच्या आई-वडिलांना व तिला मारून टाकण्याची धमकी देत पळून नेऊन तरुणीच्या मनाविरुद्ध वारंवार शारीरिक संबंध केले.
या प्रकरणात नितेश राठोड या नराधमाला त्याचे मित्र संशयित आरोपी गोविंद रामसिंग राठोड, ज्ञानेश्वर भाऊलाल चव्हाण, गोरख थानसिंग चव्हाण (सर्व रा. धानवड ता. जळगाव) यांनी मदत केली म्हणून त्यांच्यावर देखील एमआयडीसी पोलीस स्टेशनला गुन्हा दाखल करण्यात आला आहे. या घटनेमुळे जळगाव तालुक्यात एकच खळबळ उडाली असून सहाय्यक पोलीस निरीक्षक माधुरी बोरसे या घटनेचा पुढील तपास करीत आहे.
