रावेर, (प्रतिनिधी) : रावेर तालुक्यातील रोझोदा ते खिरोदा या रस्त्यावर दुचाकी घसरून २१ वर्षीय तरुणाचा मृत्यू झाल्याची घटना घडली. हा अपघात शनिवारी दुपारी घडला. मयत तरुणाचा मृतदेह यावल ग्रामीण रुग्णालयामध्ये आणण्यात आला. तर याप्रकरणी रात्री उशिरापर्यंत पोलिसात अपघाताची नोंद करण्याचे काम सुरु होते.
रावेर तालुक्यातील खिरोदा ते रोझोदा या रस्त्यावर रोझोदा गावाच्या जवळ स्मशानभूमीच्या पुढे दुचाकी क्रमांक एम. एच. १९ इ. एच. ८३२१ ने देवेंद्र राजेंद्र कोळी (वय २१ वर्षे रा. रोझोदा ता. रावेर) हा तरुण न्हावी गावाकडे जात होता. दरम्यान त्याची दुचाकी घसरली आणि त्याच्या डोक्याला दगड लागुन दुखापत झाली. त्याला तातडीने तेथून सावदा व नंतर भुसावळ येथील रूग्णालयात नेण्यात आले होते.
नंतर यावल ग्रामीण रुग्णालयामध्ये तरूणाला उपचारासाठी आणण्यात आणले असता या ठिकाणी डॉक्टरांनी तपासणी करून देवेन्द्रला मृत घोषित केले. यावेळी कुटुंबीयांनी एकच आक्रोश केला. संबंधित पोलीस स्टेशनला अकस्मात मृत्यूची नोंद करण्याचे काम सुरु होते.
