फराज अहमद | जामनेर, (प्रतिनिधी) : येथील पंचायत समितीच्या आवारातील प्रसाधन गृह मागील एका महिन्यापासून बंद असल्याने तालुक्यातून आलेल्या नागरिकांना शौचालयासाठी बाहेर जाण्याची वेळ आली आहे. विशेषतः महिलांना, अपंग व्यक्तींना आणि वृद्धांना याचा मोठा त्रास सहन करावा लागत आहे.
दरम्यान गुरूवारी संतप्त नागरिकांनी प्रसार माध्यमांसमोर आपली समस्या मांडली. तसेच प्रसाधन गृह सामान्य नागरिकांना वापरण्यासाठी खुले करण्यात यावे अशी मागणी केली. तसेच पंचायत समितीच्या अधिकाऱ्यांवर नागरिकांनी नाराजी व्यक्त केली.
गेल्या काही दिवसांपूर्वी गटविकास अधिकाऱ्यांनी आश्वासन दिले होते की प्रसाधन गृहाची दुरवस्था आणि गैरवर्तनाच्या घटनांमुळे ते बंद केले आहे, परंतु ते दोन-तीन दिवसांत प्रसाधन गृह पुन्हा सुरू केले जाईल. मात्र, पंधरा दिवस उलटून गेले तरी प्रसाधन गृह अद्यापही बंदच आहे.
