रावेर, (प्रतिनिधी) : शहरात झालेल्या घरफोडी प्रकरणाचा तपास करीत असतांना दोन जणांना रावेर पोलिसांनी अटक केली असून त्यांच्याकडून ७८ हजारांचा मुद्देमाल हस्तगत करण्यात आला आहे.
सूत्रांकडून मिळालेली माहिती अशी कि, रावेर शहरातील श्रीकृष्ण नगरात प्रवीण सिताराम महाजन (वय ३४) यांच्या घरामध्ये दि. ६ सप्टेंबर रोजी सकाळी ८ वाजता अज्ञात चोरट्यांनी घरफोडी केली होती. याप्रकरणी रावेर पोलीस स्टेशनला दाखल गुन्ह्यामध्ये पोलिसांचा तपास सुरू होता. याबाबत गैबनशहा बाबांच्या दर्ग्याच्या टेकडीखाली गोलूसिंग नशीबसिंग पटवा (वय २०, रा.बडवणी जिल्हा) आणि सुनीलसिंग केवलसिंग बरनाल (वय २६, रा.धार जि मध्यप्रदेश) या संशयित आरोपींना अटक करण्यात आली.
त्यांच्याकडून दुचाकी चोरी करण्याचे साहित्य तसेच ३ हजार रुपये किमतीची चांदीचे पैंजण असा मुद्देमाल जप्त करण्यात आला आहे. सदरची कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, डीवायएसपी अन्नपूर्णा सिंह यांच्या मार्गदर्शनाखाली निरीक्षक विशाल जयस्वाल, उपनिरीक्षक तुषार पाटील, घनश्याम तांबे, हेड कॉन्स्टेबल ईश्वर चव्हाण, सचिन घुगे, सुकेश तडवी, विकारोद्दिन शेख, अमोल जाधव, विशाल पाटील, महेश मोगरे, प्रमोद पाटील यांनी केली आहे.
