चोपडा तालुक्यातील घटनेने खळबळ
चोपडा, (प्रतिनिधी) : एका १४ वर्षीय मुलीवर बलात्कार करून तिच्या डोक्यात दगड घालून तिची निर्घृण हत्या केल्याची धक्कादायक घटना शहरापासून जवळच असलेल्या एका गावाच्या शेतात शनिवार दि. ७ सप्टेंबर रोजी घडली आहे. याप्रकरणी एका संशयित आरोपीला स्थानिक गुन्हे अन्वेषण शाखेने चौकशीसाठी ताब्यात घेतल्याची माहिती सूत्रांची दिली असून यामुळे तालुक्यात खळबळ उडाली आहे.
चोपडा शहरापासून १५ ते २० किलोमीटर असलेल्या गावात एक मोलमजुरी करणारा परिवार शेत शिवारामध्ये राहतो. या परिवारातील एक १४ वर्षीय मुलगी ही घराजवळ असताना संशयित आरोपी तेथे आला. त्याने या मुलीला शेतामध्ये ओढत नेऊन तिच्यावर बळजबरी करून अत्याचार केला. त्यानंतर तिची डोक्यात दगड टाकून निर्घुण हत्या केली. दरम्यान ही घटना आजूबाजूच्या ग्रामस्थांना समजताच त्यांनी तात्काळ पोलीस स्टेशनला कळवली.
यानंतर चोपडा शहर पोलीस स्टेशनचे कर्मचारी तसेच एलसीबी घटनास्थळी दाखल झाली. त्यांनी सर्व माहिती जाणून घेतली. यावेळी फॉरेनसिक टीम देखील घटनास्थळी पोहोचली. या घटनेमुळे चोपडासह जळगाव जिल्हा हादरला आहे. संपूर्ण जिल्ह्यात गणेशोत्सव स्थापनेचे चैतन्यदायी वातावरण असताना दुसरीकडे मात्र चोपडा तालुक्यातील या घटनेने खळबळ उडाली आहे.