जळगाव | दि.२४ जुलै २०२४ | ठाकरे गटाचे माजी उपमहापौर कुलभुषण पाटील यांनी नुकतीच मुंबईत मातोश्रीवर जाऊन पक्षप्रमुख उद्धव ठाकरे यांची भेट घेतली. दरम्यान कुलभुषण पाटील यांच्या संकल्पनेतून तयार करण्यात आलेल्या शिवसेनेच्या (ठाकरे गट) छत्री व टी शर्टचे आज शिवसेना पक्ष प्रमुख तथा माजी मुख्यमंत्री उध्दव ठाकरे यांच्या हस्ते अनावरण करण्यात आले.
पक्षाचे मशाल हे चिन्ह घराघरात पोहचविण्यासाठी याचा फायदा होईल, असा विश्वास उध्दव ठाकरे यांनी व्यक्त करत कुलभुषण पाटील यांच्या या उपक्रमाचे कौतूक केले. यावेळी त्यांनी जळगाव शहरात काम करत रहा, अशा सुचना देत राजकीय वाटचालीसाठी आर्शिवाद दिले.
उध्दव ठाकरे यांच्या वाढदिवसानिमित्ताने माजी उपमहापौर कुलभुषण पाटील यांच्या तर्फे जळगाव शहरात १० हजार छत्री व टी-शर्टचे वाटप करण्यात येणार आहे. या छत्री व टी-शर्टवर बाळासाहेब ठाकरे, उध्दव ठाकरे, अदित्य ठाकरे व कुलभुषण पाटील यांचे फोटो व मशालीचे चिन्ह आहे. या माध्यतातून पक्षाचे नाव व चिन्ह घराघरात पोहचिण्यास मदत होईल. नागरिकांच्या मनात मशालच आहे, यामुळे विधानसभा निवडणुकीत यश आपलेच आहे, अशा शब्दात उध्दव ठाकरे यांनी कुलभुषण पाटील यांचे कौतूक केले. यावेळी सुनिल ठाकूर उपस्थित होते.
कुलभूषण पाटील आणि पक्षप्रमुख उद्धव ठाकरे यांच्या भेटीमुळे जिल्ह्यातील अनेकांच्या भुवया उंचावल्या आहेत. कुलभूषण पाटील हे आगामी येऊ घातलेल्या विधानसभा निवडणुकीत जळगाव शहर मतदार संघातून निवडणूक लढवण्यासाठी इच्छुक असल्याची चर्चा असून ते निवडणूक रिंगणात उतरण्यासाठी तयारीला देखील लागले असल्याचे बोलले जात आहे.
