जळगाव | दि. १४ जुलै २०२४ | शहरातील रामदास कॉलनीत शनिवारी रात्री ८ वाजेच्या सुमारास कार व दुचाकीचा अपघात झाला. यात शास्त्री नगरात राहणारे निलेश केशव बारी (वय ४४, मूळ रा. शिरसोली) यांचा जागीच मृत्यू झाल्याची घटना घडली.
निलेश बारी हे आपल्या कुटुंबासह गिरणा टाकी परिसरातील शास्त्री नगरात राहत होते. दरम्यान रात्री ते सागर पार्ककडून दुचाकीने घराकडे जात असताना रामदास कॉलनीतील हनुमान मंदिराच्या गल्लीत अचानक समोर एक कार आली. यात दुचाकीस्वार निलेश बारी हे कार ला धडकले. ते कारच्या दरवाजावरील काचवर आदळल्याने डोक्याला गंभीर दुखापत होऊन मोठा रक्तस्त्राव झाला. ते बराच वेळ रक्ताच्या थारोळ्यात पडलेले होते.
जखमी बारी यांना शासकीय वैद्यकीय रुग्णालयात दाखल केले. वैद्यकीय अधिकारी डॉ. अमोल पाटील यांनी त्यांना मयत घोषीत करण्यात आले. कारमधील लोक अहमदनगर येथील असून ते जळगावात लग्नासाठी आले होते. दरम्यान लग्न स्थळी जात असताना हा अपघात झाल्याचे समजते.
