जळगाव | दि.२३ जुन २०२४ | समस्त वंजारी समाज सेवा संस्था मेहरूण संचलित जळगाव जिल्हा वंजारी युवा संघटनेतर्फे शनिवारी मुख्यमंत्री एकनाथ शिंदे जळगाव दौऱ्यावर असताना माजी नगरसेवक प्रशांत नाईक यांच्यासह पदाधिकाऱ्यांनी मागण्यांचे निवेदन दिले.
इतर मागासवर्ग, भटक्या जमाती तसेच विशेष मागास प्रवर्गातील जातींच्या यादीत नव्या १० पोटजातींचा समावेश करण्यात आला आहे. दरम्यान वंजारी जात भटक्या जमाती ‘ड’ मध्ये समाविष्ट असून या प्रवर्गास २.५ टक्के आरक्षण आहे. वंजारीच्या वंजार आणि वंजारा अशा दोन तत्सम जाती होत्या. त्यात आता ‘लाड वंजारी’ या जातीचा नव्याने समावेश करण्यात आला आहे.
दरम्यान यासंदर्भात अधिसुचना काढून लाडवंजारी समाजास सहकार्य करावे, यामागणीचे निवेदन माजी नगरसेवक प्रशांत नाईक यांनी मुख्यमंत्री एकनाथ शिंदे यांना जळगावात दिले. महाराष्ट्र राज्य मागासवर्ग आयोग, पुणे यांनी वंजार आणि वंजारा अशा तत्सम जाती होत्या, त्यात आता लाडवंजारी या जातीचा नव्याने समावेश केल्याबाबतचा अहवाल शासनाकडे सादर केलेला असुन शासनाने तो स्विकारला आहे.
लोकसभा निवडणुकीच्या आचारसंहितेमुळे अधिसुचना प्रलंबित होती. आता कृपया तशी अधिसुचना काढून लाडवंजारी समाजास सहकार्य करावे, अशी विनंती निवेदनाद्वारे करण्यात आली आहे. सध्या शाळा, कॉलेज मध्ये प्रवेशप्रक्रिया सुरू असल्याने पडताळणी दाखले मिळणे सोयीचे होईल.
