जळगाव, दि.०२ – प्रत्येक तरुण हा आपला लग्न मोठ्या हौस मौजेत करत असतो व लग्न सोहळा नेहमी अविस्मरणीय राहावा यासाठी तो प्रयत्न करत असतो. अशाच प्रकारे जळगावच्या धरणगाव तालुक्यातील सोनवद गावातील विजय पाटील या तरुणाने आपल्या लग्न पत्रिकेतून मतदानाबद्दलची जनजागृती करत एक आदर्श ठेवला आहे.
विजय पाटील यांचे पाच मे रोजी लग्न पार पडत असून या लग्न सोहळ्याच्या पत्रिकेत प्रत्येकाने मतदानाचा हक्क बजवावा असा आशय पत्रिकेत नमूद केला आहे. त्यामुळे मतदानासाठी जनजागृती करणाऱ्या जिल्हा प्रशासनाला विजय पाटील यांनी सुद्धा हातभार लावला आहे.
विजय पाटील यांच्या या अनोख्या उपक्रमाचं जळगावचे जिल्हाधिकारी आयुष प्रसाद यांनी तोंड भरून कौतुक केले आहे. तसेच लग्नानिमीत्त नवदांपत्याला शुभेच्छा दिल्या आहे. तसेच लग्न सोहळ्याच्या दिवशी उपस्थित सर्व वर्हाडी देखील मतदानाची शपथ घेतील असे जिल्हाधिकाऱ्यांनी सांगितले.
