जळगाव, दि. ३० – रावेर तालुक्यातील मौजे शिंगाडी येथील पुनर्वसन विषयी संबंधित विभाग मूल्यांकन अहवाल सादर करण्यास टाळाटाळ करत असल्यामुळे पुढील कार्यवाहिस विलंब होत आहे , तरी त्यांनी त्वरित अहवाल सादर करावा. पुनर्वसना करीता गट नंबर २२२ /१ हा समाविष्ट करण्यात आले असुन या गट नंबर वर संबंधित शेतकऱ्यांनी बेकायदेशीररित्या प्लॉट पडलेले असल्याने त्या सर्व नोंदी रद्द करण्यात याव्या व शासनाची दिशाभूल करणाऱ्या संबंधित अधिकाऱ्यांवर कायदेशीर कार्यवाही करण्यात यावी . या मागण्यांसाठी शिंगाडी गावातील ग्रामस्थांनी सोमवार पासुन जिल्हाधिकारी कार्यालयासमोर आमरण सुरू केले आहे.
याबाबत सविस्तर वृत्त असे की, रावेर तालुक्यातील शिंगाडी गावाचे पुनर्वसनाला सन २००७ साली तत्कालीन जिल्हाधिकारी यांनी मंजुरी दिली होती, त्यानंतर या प्रक्रियेला सुरुवात झाली. त्यामध्ये पुनर्वसनासाठी ८ गट नंबर संपादित करण्यात आलेले आहे. त्यापैकी गट नंबर २२२/१ हे सुद्धा समाविष्ट आहे. सदर क्षेत्र सुस्थितीत असुन देखील ते क्षेत्र संबंधित शेतकऱ्यांनी कायदा धाब्यावर बसवत त्या क्षेत्रांमध्ये बेकायदेशीर प्लॉट पाडून खरेदीखत केले आहे आणि बिनशेती नसलेली शेतीचे उतारे शिंगाडी ग्रामपंचायत येथील ग्रामसेवक यांनी नमुना नंबर ८ ला लावले, याची संपूर्ण चौकशी होऊन कारवाई करण्यात यावी यासाठी आज जळगावात आंदोलन करण्यात आले.
कार्यकारी अभियंता सरदार सरोवर विभाग १ यांना फैजपूर प्रांत कार्यालयातुन ४ वेळा स्मरणपत्र देऊन देखील यांनी सदर जमिनीचे मूल्यांकन अहवाल सादर केलेला नाही. मूल्यांकन अहवालाअभावी निवाडा घोषित होऊ शकणार नाही. त्यासाठी अनेकदा गावकरी मंडळी व महाराष्ट्र जनक्रांती मोर्चाचे प्रदेशअध्यक्ष मुकुंद सपकाळे यांनी संबंधित अधिकाऱ्यांना भेट घेतली मात्र काही एक उत्तर त्यांनी दिले नाही. त्यामुळेच ग्रामस्थांनी लोकशाही मार्गाने आमरण उपोषण करीत आंदोलनाला सुरुवात केली. ग्रामस्थांच्या मागण्या विचारात घेऊन त्यांना न्याय न मिळाल्यास, समस्त गावकरी तापी नदीच्या पात्रात जलसमाधी घेतील असा ईशारा देखील आंदोलनकर्त्यांनी दिला.
दरम्यान आंदोलनात अनिल बगाडे, अमृत पाटिल, उमेश गाढे, संदीप कोजगे, फुलसिंग कोजगे, आनंदा कोजगे, विजय बगाडे, रमेश पाटिल, विश्वनाथ पाटिल, साहेबराव पाटिल, यादव पाटिल, संतोष बगाडे, प्रभाकर बगाडे, भागवत बगाडे, हिरामण कोजगे, सुमनबाई बगाडे, पुताबाई कोजगे, लिलाबाई कोजगे, गोविंदा कोजगे, प्रविण कोजगे, आशाबाई कोजगे आदि ग्रामस्थ सहभागी झाले. यावेळी रिपब्लिकन पार्टी ऑफ इंडियासाचे (आठवले गट) उत्तर महाराष्ट्र अध्यक्ष रमेश मकासरे, भुसावळ नगरपालिकेच्या नगरसेविका तथा माजी उपनगराध्यक्षा लक्ष्मीताई मकासरे, छावा मराठा युवा महासंघाचे जिल्हाध्यक्ष अमोल कोल्हे, विर सावरकर रिक्षा युनियनचे अध्यक्ष दिलिप सपकाळे यांनी भेट देऊन शिंगाडी ग्रामस्थांच्या आंदोलनाला पाठिंबा दिला.
