गजानन पाटील | अमळनेर, दि. १५ – येथील मंगळग्रह सेवा संस्था संचलित श्री मंगळदेव ग्रह मंदिर परिसरात व परिसराबाहेरही सोमवारी विविध विकासकामांचे उद्घाटन, भूमिपूजन आणि संस्थेच्या नूतन माहिती पुस्तिकेचे लोकार्पण करण्यात आले. यावेळी आमदार अनिल पाटील, संतश्री प्रसाद महाराज, पोलिस अधीक्षक डॉ. प्रवीण मुंडे, अप्पर पोलिस अधीक्षक रमेश चोपडे, अनिल शिसोदे आदी मान्यवर उपस्थित होते.
यावेळी मंदिराच्या प्रांगणातील श्री तुळसाई उद्यानातील नवनिर्माण करण्यात आलेल्या जुन्या कारंजाचे तसेच मंदिराच्या प्रवेशद्वाराजवळच नवीन कारंजाचे उद्घाटन झाले. हे दोन्ही कारंजे संगणकीकृत असून, त्यांच्यात प्रत्येकी ४० प्रकारच्या विविध हालचाली आहेत. मंदिर प्रांगणातील परिसराचे नवनिर्माण करण्यात आले. तसेच मंदिराच्या संतश्वी सखाराम महाराज रोपवाटिका व सेंद्रिय खतनिर्मिती प्रकल्पाच्या विस्तारीकरणाचेही उद्घाटन झाले.
मंदिरात झालेल्या कार्यक्रमात मंगळग्रह सेवा संस्थेतर्फे पोलिस उपअधीक्षक राकेश जाधव व पोलिस निरीक्षक जयपाल हिरे यांच्या यशस्वी कार्याबद्दल तथा त्यांनी सर्वत्र सीसीटीव्ही कॅमेरे उभारणी अभियान सुरू केल्याबद्दल त्यांचा सन्मानपत्र देऊन सत्कार करण्यात आला.
आमदार अनिल पाटील म्हणाले, की विकासकामे करण्यात आणि आगळेवेगळे व लोकाभिमुख उपक्रम राबविण्यात मंगळग्रह सेवा संस्थेचे पदाधिकारी अत्यंत तरबेज आहेत. शासनाच्या माध्यमातून विविध योजना तथा निधी प्राप्तीसाठी कसे प्रयत्न करावेत, हे मंगळग्रह सेवा संस्थेकडूनच शिकावे. मी शासनाकडे सातत्यपूर्ण पाठपुरावा केल्याने नजीकच्याच काळात भरीव शासकीय निधीच्या माध्यमातून मंदिराचा प्रचंड कायापालट होईल.
यावेळी खानदेश शिक्षण मंडळाचे कार्याध्यक्ष हरी वाणी, कार्यउपाध्यक्ष योगेश मुंदडे, संचालक विनोद पाटील, प्रदीप अग्रवाल, नीरज अग्रवाल, उपाध्यक्षा माधुरी पाटील तसेच माजी कार्याध्यक्ष जितेंद्र जैन यांचाही सत्कार करण्यात आला. डिगंबर महाने यांनी सूत्रसंचालन केले. संस्थेचे उपाध्यक्ष एस. एन.पाटील, सचिव एस. बी. बाविस्कर, सहसचिव दिलीप बहिरम, खजीनदार गिरीश कुलकर्णी, विश्वस्त जयश्री साबे यांच्यासह मोठ्या संख्येने भाविक उपस्थित होते.
