जळगाव,दि. ०१ – महानगरपालिकेच्या स्वच्छ सर्वेक्षण २०२२ नुसार प्रभाग क्रमांक १२ मध्ये कचरामुक्त कॉलनी या उपक्रमाअंतर्गत जळगाव शहर महानगर पालिकेतर्फे मंगळवारी काॅलनीतील नागरिकांचा सत्कार सन्मान करण्यात आला. शहरातील रोटरी भवन मायादेवी नगर या ठिकाणी हा छोटेखानी कार्यक्रम घेण्यात आला.
दरम्यान परिसरातील नागरिकांचा जळगाव शहर महानगर पालिकेतर्फे महापौर जयश्री सुनील महाजन यांच्या हस्ते सत्कार सन्मान करण्यात आला. यावेळी महापौर जयश्री महाजन यांच्या निर्देशानुसार परिसरातील २८ कॉलन्या कचरामुक्त घोषित करण्यात आल्या असून, नागरिकांनी आपला परिसर स्वच्छ कसा ठेवता येईल या साठी प्रयत्न करणे गरजेचे असल्याचे आवाहन केले. त्याच बरोबर स्वच्छता मोहिमेसाठी पालिकेचे देखील सहकार्य मिळेल असे सांगितले.
यावेळी नगरसेविका उज्वला बेंडाळे, गायत्री राणे, इंडियन रेडक्रॉस सोसायटीचे सचिव विनोद बियाणी, महापालिकेचे उपायुक्त शाम गोसावी, शहर समन्वयक महेंद्र पवार, आरोग्य निरीक्षक उल्हास इंगळे, प्रमुख केतन हातागळे, रोटरी वेस्टचे पदाधिकारींसह महापालिकेचे कर्मचारी उपस्थित होते.
