जळगाव, प्रतिनिधी : आजच्या बदलत्या सामाजिक परिस्थितीत पालक आणि मुलांमधील संवादाचा अभाव, वाढते गैरसमज आणि भावनिक दुरावा यामुळे कुटुंबव्यवस्थेसमोर अनेक प्रश्न निर्माण होत आहेत. याच संवेदनशील विषयावर ‘न समजलेले आई-बाप’ या विषयाचे प्रसिद्ध व्याख्याते प्रा. वसंत हंकारे यांचे विशेष व्याख्यान उद्या, रविवार दि. ६ सप्टेंबर रोजी जळगाव येथे आयोजित करण्यात आले आहे.
प्रेस फोटोग्राफर फाऊंडेशन, जळगाव यांच्या माध्यमातून या व्याख्यानाचे आयोजन करण्यात आले आहे. मु. जे. महाविद्यालय, जळगाव येथे होणाऱ्या या कार्यक्रमात वसंत हंकारे हे आपल्या प्रभावी आणि ओघवत्या शैलीत पालक-मुलांचे नाते, संवादाचे महत्त्व, संस्कार, भावनिक गरजा आणि बदलत्या जीवनशैलीचा कुटुंबावर होणारा परिणाम यावर मार्गदर्शन करणार आहेत.
आजच्या डिजिटल युगात मोबाईल, सोशल मीडिया, शिक्षण, करिअर आणि बदलती जीवनशैली यामुळे तरुण पिढीसमोर अनेक आव्हाने आहेत. त्याचवेळी पालकांच्या अपेक्षा आणि मुलांच्या भावविश्वामध्ये निर्माण होणारी दरी हा देखील चिंतेचा विषय आहे. या पार्श्वभूमीवर ‘न समजलेले आई-बाप’ हे व्याख्यान युवक-युवती तसेच पालकांसाठी अत्यंत मार्गदर्शक ठरणार आहे.
पालक आणि मुलांमध्ये संवाद वाढावा, एकमेकांच्या भावना समजून घ्याव्यात आणि कुटुंबातील नात्यांमध्ये आपुलकी, विश्वास व समजूतदारपणा वाढावा, या उद्देशाने या व्याख्यानाचे आयोजन करण्यात आले आहे. त्यामुळे जळगाव शहरासह जिल्ह्यातील युवक-युवती, पालक, शिक्षक आणि नागरिकांनी या व्याख्यानाचा लाभ घ्यावा, असे आवाहन प्रेस फोटोग्राफर फाऊंडेशन, जळगाव यांच्या वतीने करण्यात आले आहे.
