जळगाव, प्रतिनिधी : राज्य शासनाने भारतीय प्रशासकीय सेवेतील (आयएएस) १० वरिष्ठ अधिकाऱ्यांच्या बदल्यांचे आदेश जारी केले असून, जळगावच्या प्रांताधिकारीपदी आयएएस अधिकारी योगेशकुमार मीना यांची नियुक्ती करण्यात आली आहे. विद्यमान प्रांताधिकारी विनय गोसावी यांच्या जागी मीना यांची नियुक्ती झाली असून, ते येत्या सोमवारी जळगाव येथे येऊन आपल्या नव्या पदाचा अधिकृत पदभार स्वीकारण्याची दाट शक्यता आहे. या प्रशासकीय फेरबदलामुळे जळगावच्या महसूल वर्तुळात मोठी चर्चा सुरू झाली आहे.
बी.टेक.चे शिक्षण पूर्ण केलेले योगेशकुमार मीना हे २०२४ च्या तुकडीतील आयएएस अधिकारी असून, ते सध्या हिंगोली येथे सहायक जिल्हाधिकारी म्हणून प्रशासकीय सेवेचा अनुभव घेत आहेत. हिंगोलीतील त्यांच्या कार्यकाळानंतर आता राज्य शासनाने त्यांच्यावर जळगाव प्रांताधिकारी पदाची अत्यंत महत्त्वाची व जबाबदारीची धुरा सोपवली आहे. जळगाव प्रांताधिकारी कार्यालयांतर्गत महसूल प्रशासन, आगामी निवडणूक प्रक्रिया, आपत्ती व्यवस्थापन, जमीन महसूल आणि सामान्य नागरिकांचे प्रशासकीय प्रश्न मार्गी लावणे अशा अनेक आव्हानात्मक जबाबदाऱ्या पार पाडाव्या लागतात.
दरम्यान, तत्कालीन प्रांताधिकारी विनय गोसावी यांच्या पुढील नवीन नियुक्तीबाबत शासनाच्या आदेशात स्पष्ट उल्लेख नसल्याने त्यांच्या पुढील पदाबाबत प्रशासकीय वर्तुळात उत्सुकता आहे.
योगेशकुमार मीना यांच्या नियुक्तीमुळे जळगावच्या महसूल प्रशासनाला नवा गतीमान चेहरा मिळणार असून, नागरिकांच्या समस्या तत्परतेने सुटतील, अशी अपेक्षा व्यक्त केली जात आहे.
