जळगाव, प्रतिनिधी : नारीशक्तीचा साहसी आविष्कार, युवतींच्या धाडसाचा थरार आणि महाराष्ट्राच्या सांस्कृतिक परंपरेचा जल्लोष अनुभवण्याची संधी जळगावकरांना शनिवारी, ५ सप्टेंबर रोजी मिळणार आहे. भवरलाल ॲण्ड कांताबाई जैन फाऊंडेशन व युवाशक्ती फाउंडेशनतर्फे आयोजित ‘युवतींची दहीहंडी २०२६’ हा भव्य सोहळा सायंकाळी ६ ते रात्री ९.३० या वेळेत शिवतीर्थ मैदान (जी.एस. ग्राउंड) येथे रंगणार आहे. या सोहळ्यासाठी १५ महिला गोविंदा पथकांमधील तब्बल ६८५ युवतींचा कसून सराव सुरू असून, त्यांच्या मानवी मनोऱ्यांचा थरार पाहण्याची उत्सुकता जळगावकरांमध्ये निर्माण झाली आहे.
या दहीहंडी सोहळ्याची तयारी अंतिम टप्प्यात आली असून, सहभागी होणाऱ्या युवतींच्या सुरक्षेची विशेष काळजी घेण्यात आली आहे. प्रत्येक महिला गोविंदाचा १० लाख रुपयांचा अपघाती विमा आयोजकांकडून उतरविण्यात आला आहे. दहीहंडीचा हा उत्सव सर्वांसाठी खुला असून प्रवेश विनामूल्य आहे. जळगाव शहरासह जिल्ह्यातील युवतींनी, कुटुंबीयांनी आणि नागरिकांनी मोठ्या संख्येने उपस्थित राहून नारीशक्तीच्या या धाडसी उपक्रमाला प्रोत्साहन द्यावे, असे आवाहन युवतींच्या दहीहंडी उत्सव समितीच्या स्वागत समिती प्रमुख डॉ. कल्याणी नागूलकर यांनी पत्रकारांशी संवाद साधताना केले.
किड्स गुरूकूल इंटरनॅशनल, अनुभूती स्कूल, आर.आर. इंग्लिश मीडियम स्कूल, उडाण फाऊंडेशन, केसीई मुलींचे वसतिगृह, अण्णासाहेब जी.डी. बेंडाळे महिला महाविद्यालय, नूतन मराठा महाविद्यालय, एल.एच. पाटील पब्लिक स्कूल आणि हरिजन कन्या छात्रालय आदी शाळा-महाविद्यालयांमधील १५ संघ सहभागी होत आहेत. या संघांमधून तब्बल ६८५ महिला गोविंदा युवती सहभागी होणार असून, त्यांच्या साहसी मानवी मनोऱ्यांचा थरार शिवतीर्थावर अनुभवता येणार आहे.
दहीहंडीच्या माध्यमातून साहसासोबतच समता आणि समान संधीचा संदेश देण्याचा आयोजकांचा प्रयत्न आहे. हा केवळ स्पर्धेचा कार्यक्रम नसून उत्सव आहे, हे अधोरेखित करण्यासाठी सहभागी होणाऱ्या सर्व १५ संघांना दहीहंडी फोडण्याची संधी देण्यात येणार आहे. त्यासाठी मैदानावर १५ दहीहंड्या उभारण्यात येणार आहेत.
मागील वर्षीच्या दहीहंडीच्या समारोपावेळी जैन इरिगेशनचे अध्यक्ष अशोक जैन यांनी युवतींसाठी रोख पारितोषिके देण्याची घोषणा केली होती. त्या घोषणेची यंदा पूर्तता करण्यात येणार आहे. प्रथम क्रमांकाच्या संघाला ३१ हजार १११ रुपये, द्वितीय क्रमांकाला २१ हजार १११ रुपये, तर तृतीय क्रमांकाच्या संघाला ११ हजार १११ रुपये, अशी एकूण ६३ हजार ३३३ रुपयांची रोख पारितोषिके देण्यात येणार आहेत. उत्कृष्ट साहसी खेळाचे प्रदर्शन करणाऱ्या युवतींचाही विशेष स्मृतिचिन्ह देऊन गौरव करण्यात येणार असून, सहभागी सर्व संघांना प्रमाणपत्र दिले जाणार आहे.
युवतींच्या दहीहंडीचा थरार वाढविण्यासाठी विविध सांस्कृतिक आणि साहसी कार्यक्रमांचे आयोजन करण्यात आले आहे. ‘शौर्यवीर’ आणि ‘महाबली’ या दोन ढोल पथकांमधील तब्बल २१३ ढोलवादक आपल्या दमदार वादनाने वातावरण दणाणून सोडणार आहेत. मर्दानी खेळ, चिमुकल्यांसाठी सांस्कृतिक नृत्य, रिदमिक योगा, लाईव्ह सिंगिंग, स्लाईन डीजे, लेझर शो आणि आकर्षक फटाक्यांची आतषबाजी हे कार्यक्रमाचे प्रमुख आकर्षण ठरणार आहे.
शहरातील १५ रिल्स स्टार युवतींचाही या उत्सवात सहभाग राहणार असून, त्यामुळे तरुणाईमध्ये विशेष उत्साहाचे वातावरण निर्माण होणार आहे. चिमुकल्यांसाठी मल्लखांबासह विविध साहसी खेळांचे प्रदर्शनही या वेळी पाहायला मिळणार आहे. नारीशक्तीच्या सामर्थ्याचा जागर करणाऱ्या या अनोख्या सोहळ्यास जळगावकरांनी मोठ्या संख्येने उपस्थित राहून युवतींच्या धाडसाला दाद द्यावी, असे आवाहन आयोजकांनी केले आहे.
