जळगाव, दि. १५ – नाशिक येथे गिरणा गौरव प्रतिष्ठान तर्फे गेल्या २४ वर्षांपासून साहित्य, सामाजिक क्षेत्रात विशेष उल्लेखनीय काम करणाऱ्या व्यक्तींना गौरवण्यात येते. यावर्षी सामाजिक व सांस्कृतिक क्षेत्रात काम करणाऱ्या मान्यवरांची नावे प्रतिष्ठानतर्फे नुकतीच जाहीर करण्यात आली. यात परिवर्तनचे अध्यक्ष व जेष्ठ नाटककार शंभू पाटील यांना यावर्षाचा “गिरणा गौरव पुरस्कार” जाहीर झाला आहे.
नाट्यक्षेत्रात अनेक वर्षांपासून केलेले कार्य, परिवर्तनच्या माध्यमातून सांस्कृतिक क्षेत्रातील वैशिष्ट्यपूर्ण उपक्रमांमुळे शंभू पाटील यांची निवड केल्याचे प्रतिष्ठानच्या वतीने जाहीर करण्यात आले आहे. शंभू पाटलांच्या रूपाने नाट्यक्षेत्रातील कलावंतांला पहिल्यांदाच सन्मानित करण्यात येत आहे. ५ एप्रिल रोजी रेमन मॅगसेसे पुरस्काराने सन्मानित राजेंद्र सिंह यांच्या हस्ते पुरस्कार प्रदान करण्यात येणार आहे.
या अगोदर डॉ भालचंद्र नेमाडे, सिंधुताई सपकाळ, सदाशिव अमरापूरकर यासारख्या महाराष्ट्रातील प्रमुख लेखक व कलावंतांना सन्मानित करण्यात आले आहे. या पुरस्कारबद्दल भालचंद्र नेमाडे, जैन उद्योग समूहाचे अध्यक्ष अशोक जैन यांनी शंभू पाटील यांचे अभिनंदन केले. हा प्रतिष्ठेचा सन्मान म्हणजे परिवर्तन परिवाराचा सन्मान असल्याने परिवर्तन परिवारात आनंद व्यक्त होत आहे.
