जळगाव, (प्रतिनिधी) : शहरातील कालिका माता मंदिर परिसरातील एचडीएफसी बँकेसमोरून धाडसी चोरी करणाऱ्या आरोपीला शनीपेठ पोलिसांनी अवघ्या काही तासांत अटक केली आहे. पोलिसांनी आरोपीकडून चोरीला गेलेली ₹१,००,००० ची संपूर्ण रोकड आणि गुन्ह्यात वापरलेली इलेक्ट्रिक स्कूटर जप्त केली आहे.
घटनेची सविस्तर माहिती अशी की, फिर्यादी अबरार अली इरफान अली चौधरी (२६, रा. मेहरूण) हे १३ जुलै २०२६ रोजी दुपारी कालिका माता मंदिर चौकातील बँकेत आले होते. त्यांनी आपली मोटरसायकल पार्क करून पाणीपुरी खात असताना, अज्ञात चोराने त्यांच्या गाडीच्या डिक्कीतून ₹१,००,००० ची रोकड चोरून नेली. याप्रकरणी १६ जुलै २०२६ रोजी शनीपेठ पोलीस ठाण्यात गुन्हा दाखल करण्यात आला होता.
गुन्ह्याचे गांभीर्य ओळखून पोलीस अधीक्षक श्रीकांत धिवरे यांच्या मार्गदर्शनाखाली पोलीस निरीक्षक विशाल जयस्वाल व त्यांच्या शोध पथकाने तातडीने तपास सुरू केला. पथकाने घटनास्थळ परिसरातील अनेक सीसीटीव्ही कॅमेऱ्यांचे फुटेज गोळा करून त्याचे तांत्रिक विश्लेषण केले. तांत्रिक पुरावे आणि गुप्त बातमीदारांकडून मिळालेल्या माहितीच्या आधारे पोलिसांनी रवि जगदीश प्रजापत (वय ३६ वर्षे, रा. प्रजापत नगर, मामुराबाद रोड, जळगाव) याला निसर्ग कॉलनी, असोदा रोड येथून ताब्यात घेतले. चौकशीदरम्यान त्याने चोरीची कबुली दिली असून, पोलिसांनी त्याच्याकडून संपूर्ण रोकड आणि गुन्ह्यातील स्कूटर हस्तगत केली आहे.
या यशस्वी कारवाईबद्दल पोलीस अधीक्षक श्रीकांत धिवरे, अपर पोलीस अधीक्षक संदीप गावित आणि उपविभागीय पोलीस अधिकारी नितीन गणपुरे यांनी पोलीस निरीक्षक विशाल जयस्वाल, उपनिरीक्षक संतोष खेडकर, अभिषेक कटारे व संपूर्ण शोध पथकाचे कौतुक केले आहे. दरम्यान, नागरिकांनी आपल्या वाहनांच्या डिक्कीत किंवा वाहनात निष्काळजीपणे मोठी रोकड अथवा मौल्यवान वस्तू ठेवू नयेत, असे आवाहन पोलीस प्रशासनातर्फे करण्यात आले आहे.
