जळगाव, (प्रतिनिधी) : एरंडोल तालुक्यातील सुप्रसिद्ध पद्मालय गणेश देवस्थान परिसरातील जंगलात एका ३० वर्षीय अज्ञात महिलेचा अर्धवट जळालेल्या अवस्थेत मृतदेह आढळल्याने संपूर्ण जिल्ह्यात खळबळ उडाली आहे. हा प्रकार नियोजनबद्ध केलेला खून असून, पुरावा नष्ट करण्याच्या उद्देशाने मृतदेह पेटवून दिल्याचे प्राथमिक तपासात निष्पन्न झाले आहे.
गुराख्यामुळे उघडकीस आली घटना..
मिळालेल्या माहितीनुसार, पद्मालय ते नागदुली रस्त्यावरील जंगलात गुरुवारी काही गुराखी आपली गुरे चारण्यासाठी गेले होते. यावेळी एका गुराख्याला मानवी अवशेष दिसले. जवळ जाऊन पाहिले असता, एका महिलेचा कमरेपासून तोंडापर्यंतचा भाग पूर्णपणे जळालेल्या अवस्थेत होता, तर केवळ पाय सुस्थितीत दिसत होते. या धक्कादायक प्रकारानंतर गुराख्यांनी तातडीने ग्रामस्थांना आणि एरंडोल पोलीस स्टेशनला माहिती दिली.
वरिष्ठ पोलीस अधिकाऱ्यांची धाव..
घटनेचे गांभीर्य ओळखून पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर, उपविभागीय पोलीस अधिकारी विनायक कोते, एरंडोलचे निरीक्षक निलेश गायकवाड आणि स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांनी तातडीने घटनास्थळी धाव घेतली.
तपासासाठी तांत्रिक पथके तैनात..
घटनेचा छडा लावण्यासाठी पोलिसांनी तात्काळ श्वानपथक, मोबाईल फॉरेन्सिक व्हॅन, ठसे तज्ज्ञ यांचे पथके पाचारण केले. दरम्यान प्राथमिक अंदाजानुसार, ज्वलनशील पदार्थाचा वापर करून मृतदेह जाळण्यात आला आहे. सायंकाळी ५ वाजेच्या सुमारास मृतदेह जळगाव येथील शासकीय वैद्यकीय महाविद्यालय व रुग्णालयात शवविच्छेदनासाठी पाठवण्यात आला आहे.
ओळख पटवणे हेच मोठे आव्हान..
सदर महिलेचा चेहरा आणि शरीराचा वरचा भाग जळालेला असल्याने तिची ओळख पटवणे पोलिसांसाठी कठीण झाले आहे. हा खून अत्यंत नियोजनबद्ध पद्धतीने करून पुरावा नष्ट करण्याचा प्रयत्न झाला असल्याने याला ‘परफेक्ट मर्डर’च्या दृष्टीने पाहिले जात आहे. जिल्ह्यातील बेपत्ता महिलांच्या तक्रारींची आता पोलीस पडताळणी करत असून, आरोपींच्या मुसक्या आवळण्यासाठी विविध पथके रवाना करण्यात आली आहेत.
