जळगाव, (प्रतिनिधी) : हिवाळ्यासाठी विक्रीला आलेली एक लाख तीन हजार ४५० रुपये किमतीची ब्लँकेट घेऊन अवघे ५० हजार रुपये देत, उर्वरित रकमेसाठी जळगावात कापड व्यावसायिकाची ५३ हजार ४५० रुपयांनी फसवणूक केल्याचा प्रकार उघडकीस आला आहे. २६ नोव्हेंबर रोजी घडलेल्या या घटनेप्रकरणी दिल्ली आणि उत्तर प्रदेशमधील तीन विक्रेत्यांविरुद्ध जिल्हापेठ पोलीस ठाण्यात गुन्हा दाखल करण्यात आला आहे.
मेरठ (उत्तर प्रदेश) येथील इकरार इसरार अहमद (वय ३०) यांचा कापड व्यवसाय असून, त्यांनी हिवाळ्यातील विक्रीसाठी ब्लँकेट मागवले होते. या ब्लँकेटची ४५० नग असलेली नऊ पार्सले गेल्या दोन महिन्यांपासून जळगावातील ट्रान्सपोर्टमध्ये पडून होती. ती खराब होऊ नये म्हणून अहमद यांनी काही विक्रेत्यांना जळगावातूनच ब्लँकेट उचलून घेण्यास सांगितले. यासाठी त्यांनी त्यांच्या एका कर्मचाऱ्याला जळगावात पाठवले.
विक्रेते अफजल, आरीफ आणि असलम (पूर्ण नाव समजू शकले नाही) यांनी जळगावात आलेल्या कापड व्यावसायिकाच्या कर्मचाऱ्याशी संपर्क साधला. त्यांनी एक लाख तीन हजार ४५० रुपये किमतीची ब्लँकेटची नऊ पार्सले ताब्यात घेतली. मात्र, कर्मचाऱ्याला केवळ ५० हजार रुपये दिले आणि उर्वरित ५३ हजार ४५० रुपये ब्लँकेटच्या विक्रीनंतर देण्याचे आश्वासन दिले. यातील एका आरोपीने कर्मचाऱ्याला चहा पिण्याच्या बहाण्याने बाजूला नेले आणि उर्वरित दोन आरोपींनी ब्लँकेटची नऊ पार्सले वाहनात भरून तात्काळ उत्तर प्रदेशकडे पोबारा केला.
जिल्हापेठ पोलिसांत गुन्हा दाखल..
फसवणूक झाल्याचे लक्षात येताच कापड व्यावसायिक इकरार इसरार अहमद यांनी जिल्हापेठ पोलीस ठाण्यात धाव घेऊन फिर्याद दिली. त्यानुसार, अफजल, आरीफ, आणि असलम नामक तिघांविरुद्ध फसवणुकीचा गुन्हा दाखल करण्यात आला आहे. जिल्हापेठ पोलीस या तिन्ही आरोपींचा कसून शोध घेत आहेत.
