जामनेर (प्रतिनिधी) : जामनेर नगरपरिषदेच्या नगराध्यक्षपदाच्या निवडणुकीत आज (२० नोव्हेंबर, २०२५) माघारीच्या दिवशी एक महत्त्वपूर्ण राजकीय घडामोड झाली. राज्याचे मंत्री गिरीश महाजन यांच्या पत्नी साधना महाजन यांची नगराध्यक्षपदी बिनविरोध निवड झाली आहे. त्यांच्यासह भाजपचे सहा सदस्य देखील हे बिनविरोध निवडून आले आहेत.
या निवडणुकीत काँग्रेस, राष्ट्रवादी काँग्रेस (शरद पवार गट) आणि राष्ट्रवादी काँग्रेस (अजित पवार गट) या प्रमुख विरोधी पक्षांच्या उमेदवारांनी अर्ज मागे घेतल्यामुळे ही बिनविरोध निवड निश्चित झाली. जामनेर नगरपरिषदेच्या इतिहासात ही एक लक्षणीय घटना मानली जात आहे.
मतदानापूर्वीच बिनविरोध विजय..
या निवडणुकीत साधना महाजन यांच्या विरोधात एकही उमेदवार रिंगणात न राहिल्याने, मतदानाची प्रक्रिया होण्यापूर्वीच त्यांचा विजय निर्विवाद ठरला आहे. यामुळे जामनेर नगरपरिषदेवर पुन्हा एकदा मंत्री गिरीश महाजन यांचे निर्विवाद वर्चस्व कायम राहिले आहे.
कार्यकर्त्यांचा जल्लोष..
बिनविरोध निवडीचे वृत्त कळताच महाजन समर्थकांनी व कार्यकर्त्यांनी जामनेर शहरात मोठा जल्लोष केला. फटाक्यांची आतषबाजी आणि आनंदोत्सव साजरा करण्यात आला. साधना महाजन यांच्या निवडीमुळे आता जामनेर नगरपरिषदेच्या आगामी वाटचालीस नवी दिशा मिळण्याची शक्यता आहे.
