जळगाव, (प्रतिनिधी) : जुन्या वादातून सुरू असलेल्या वादाचे रूपांतर थेट गोळीबारात झाले आणि कांचन नगर परिसर हादरला. रविवारी दि.९ रोजी रात्री १०.३० वाजता घडलेल्या या घटनेत आकाश युवराज बाविस्कर उर्फ ‘टपऱ्या’ याचा दुर्दैवी मृत्यू झाला, तर अन्य दोन जण जखमी झाले आहेत. विशेष म्हणजे, गोळीबार करणारा मुख्य आरोपी आकाश सपकाळे हा हद्दपार केलेला असतानाही त्याने शहरात येऊन ही घटना घडवली असून, तो सध्या पसार झाला आहे.
नेमकी घटना काय?
हद्दपार केलेला आरोपी आकाश सपकाळे उर्फ डोया आणि सागर सपकाळे यांच्यात जुना वाद होता. रविवारी संध्याकाळपासूनच परिसरात या वादातून धुसफूस सुरू होती. रात्री हा वाद विकोपाला गेला. रात्री १०.३० च्या सुमारास आकाश सपकाळे याने सागर सपकाळे यांच्या घरासमोर येऊन थेट गोळीबार केला.
या गोळीबारात सागर सपकाळे यांचे भाचे गणेश सोनवणे यांच्या हाताला, तर तुषार रामचंद्र सोनवणे यांच्या कानाला गोळी लागून ते जखमी झाले. याव्यतिरिक्त, आकाश युवराज बाविस्कर उर्फ टपऱ्या याच्या छातीत गोळी लागल्याने तो गंभीर जखमी झाला.
गोळीबारातील सर्व जखमींना तातडीने शासकीय वैद्यकीय महाविद्यालय व रुग्णालयात दाखल करण्यात आले. तेथे उपचार सुरू असतानाच आकाश बाविस्कर (टपऱ्या) याचा मृत्यू झाला. या घटनेनंतर रुग्णालयात आणि घटनास्थळी नागरिकांची मोठी गर्दी झाली होती.
घटनेची माहिती मिळताच अप्पर पोलिस अधीक्षक अशोक नखाते, उपविभागीय पोलिस अधिकारी नितीन गनापुरे, तसेच शनिपेठ पोलिस ठाण्याच्या निरीक्षक कावेरी कमलापूरकर यांच्यासह मोठा पोलीस फौजफाटा घटनास्थळी दाखल झाला. पोलिसांनी पंचनामा करून तपास सुरू केला आहे. हद्दपारीचे उल्लंघन करून जळगावात येऊन गोळीबार करणारा आरोपी आकाश सपकाळे याच्या अटकेसाठी पोलीस पथके रवाना झाली आहेत.
