जळगाव, (प्रतिनिधी) : स्व. वसंतराव चांदोरकर स्मृती प्रतिष्ठान आयोजित २४ व्या “पाडवा पहाट” या प्रातःकालीन संगीत मैफलीला जळगावकर रसिकांनी उत्स्फूर्त दाद दिली. महात्मा गांधी उद्यानात पहाटे आयोजित करण्यात आलेल्या या कार्यक्रमात प्रख्यात राष्ट्रीय कीर्तनकार, शास्त्रीय तसेच नाट्यसंगीत गायक व नट डॉ. चारुदत्त आफळे यांनी त्यांच्या नाट्यसंगीत व अभंग वाणीने उपस्थितांना मंत्रमुग्ध केले.
कार्यक्रमाची सुरुवात वरुण नेवे यांनी सादर केलेल्या गुरुवंदनेने झाली. त्यानंतर डॉ. रणजीत चव्हाण, प्रतिष्ठानचे अध्यक्ष डॉ. विवेकानंद कुलकर्णी, दीपक चांदोरकर, अरविंद देशपांडे, डॉ. चारुदत्त आफळे यांच्या हस्ते दीप प्रज्वलन करण्यात आले. मेजर नाना वाणी, विवेकानंद कुलकर्णी व शरदचंद्र छापेकर यांनी कलाकारांचा सत्कार केला. कार्यक्रमाचे सूत्रसंचालन अनघा नाईक गोडबोले हिने केले.
कार्यक्रमात “पंचतुंड नर रुंड माल धर” नांदी, मानापमान नाटकातील गाजलेले पद “चंद्रिका ही जणू”, संत कान्होपात्रा नाटकातील “पतीत तू पावना”, रणदुंदुभी नाटकातील “दिव्य स्वातंत्र्य रवी” आणि देव दिना घरी धावला नाटकातील भावार्थपूर्ण “ऋणानुबंधाच्या जिथून पडल्या गाठी” ही पदे सादर सादर करण्यात आली. सं. मत्स्यगंधा नाटकातील जितेंद्र अभिषेक यांनी संगीतबद्ध केलेले “गुंतता हृदय हे” आणि सं. कट्यार काळजात घुसली नाटकातील “तेजोनिधी लोह गोल ! भास्कर हे गनन राज” व “सुरत पिया की छिन् बिसुराये” या पदांनी रसिकांना मंत्रमुग्ध केले. सुमारे दोन तास चाललेल्या या मैफलीची सांगता “सर्वात्मका सर्वेश्वरा” या भैरवीने झाली.
जळगाव शहराचे आमदार सुरेश भोळे यांनीही या मैफलीचा आस्वाद घेतला. अनेक मान्यवरांसह जळगाव शहरातील तमाम रसिक वर्ग या मैफिलीने मंत्रमुग्ध झाला. कै. नथ्थुशेट चांदसरकर चॅरिटेबल ट्रस्ट व भवरलाल अँड कांताबाई जैन फाउंडेशनचे सहकार्य या मैफिलिस लाभले. स्निग्धा कुलकर्णी, प्रसन्न भुरे, अथर्व मुंडले, वरूण नेवे, वरूण देशपांडे, अनघा नाईक गोडबोले यांनी कार्यक्रमाच्या यशस्वीतेसाठी परिश्रम घेतले.
