जळगाव, (प्रतिनिधी) : नर्सिंगचे शिक्षण घेत असलेल्या विद्यार्थी आणि विद्यार्थिनींना जर्मन देशात रोजगाराच्या प्रचंड संधी उपलब्ध आहेत. कठोर परिश्रम आणि गुणवत्तेच्या आधारावर या संधी मिळवता येतात, असे प्रतिपादन अ‍ॅझ ईडीयु कॉर्पो ट्रेनिंग अँन्ड डेव्हलपमेंट इंडस्ट्रीचे चेअरमन परमजित सेहगल यांनी आज गोदावरी कॉलेज ऑफ नर्सिंग येथे केले.
नर्सिंग विद्यार्थ्यांसाठी जर्मनीतील प्लेसमेंट संदर्भात आयोजित केलेल्या विशेष मार्गदर्शन कार्यक्रमात ते बोलत होते. हा कार्यक्रम ‘अ‍ॅझ ईडीयु कॉर्पो ट्रेनिंग अँन्ड डेव्हलपमेंट इंडस्ट्री’ (नवी दिल्ली) आणि गोदावरी नर्सिंगच्या प्लेसमेंट सेलच्या संयुक्त विद्यमाने पार पडला. सेहगल यांनी परिचारिकांसाठी विविध देशांत मोठ्या संधी असल्या तरी, जर्मनीतील करिअरसाठी आवश्यक कौशल्य विकास आणि प्रशिक्षणाचे महत्त्व समजावून सांगितले. यासाठी लागणारी कागदपत्रे आणि प्रशिक्षणाच्या संधीही मोठ्या प्रमाणावर उपलब्ध असल्याचे त्यांनी स्पष्ट केले.
यावेळी, जनरल मॅनेजर स्नेहलता यांनी परदेशातील संधींबाबत होणाऱ्या फसवणुकीपासून वाचण्यासाठी विद्यार्थ्यांनी कोणती काळजी घ्यावी, तसेच योग्य संस्थांची निवड कशी करावी, याबद्दल मार्गदर्शन केले. कार्यक्रमासाठी परमजीत सेहगल आणि स्नेहलता यांच्यासह प्राचार्य विशाखा गणविर, उपप्राचार्य जयसिंग ढाया, प्रा. मनोरमा कश्यप आदी उपस्थित होते. प्रा. मनोरमा कश्यप यांनी सूत्रसंचालन व आभार प्रदर्शन केले.
