जळगाव, (प्रतिनिधी) : जळगाव स्थानिक गुन्हे शाखेने पाळधी येथे सुरू असलेल्या एका मोठ्या जुगार अड्ड्यावर यशस्वी छापा टाकत १६ आरोपींना रंगेहाथ अटक केली आहे. या कारवाईत पोलिसांनी एकूण १२ लाख २४ हजार २६० रुपयांचा मुद्देमाल जप्त केला आहे, ज्यात रोख रक्कम आणि महागड्या मोबाईल फोनचा समावेश आहे.
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना आज, सोमवार, दि. ८ सप्टेंबर रोजी पाळधी येथील शाम कॉलनीमध्ये एका घरात जुगार अड्डा सुरू असल्याची गुप्त माहिती मिळाली. या माहितीच्या आधारे त्यांनी तात्काळ उपनिरीक्षक शरद बागल यांच्या नेतृत्वाखाली एक विशेष पथक तयार केले.
पथकाने मिळालेल्या माहितीनुसार, छापा टाकून घराच्या दुसऱ्या मजल्यावर सुरू असलेल्या जुगार अड्ड्याला घेरले. या छाप्यात पोलिसांनी १६ आरोपींना ताब्यात घेतले. त्यांच्याकडून ७,२२,२६० रुपये रोख रक्कम आणि ५,०२,००० रुपये किमतीचे विविध कंपन्यांचे मोबाईल फोन असा एकूण १२,२४,२६० रुपयांचा मुद्देमाल जप्त करण्यात आला.
सर्व आरोपींविरुद्ध धरणगाव पोलीस स्टेशनमध्ये गुन्हा दाखल करण्यात आला असून पुढील कायदेशीर कारवाई सुरू आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर, अपर पोलीस अधीक्षक, चाळीसगांव परिमंडळ आण्णासाहेब घोलप, स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांचे मार्गदर्शनाखाली पोउपनि. शरद बागल, पोहेकों अक्रम शेख, प्रविण भालेराव, मुरलीधर धनगर, नितीन बावीस्कर, सलीम तडवी, विनोद पाटील, विजय पाटील, रंविंद्र चौधरी, रविंद्र कापडने, सिध्देश्वर डापकर, राहुल रगडे, रतन गिते, मयुर निकम, भारत पाटील, महेश सोमवंशी, प्रमोद ठाकुर, पाळधी दुरक्षेत्राचे सपोनि. प्रशांत कंडारे, अमोल धोबी, पोकॉ रविंद्र चौधरी आणि इतर वरिष्ठ अधिकाऱ्यांच्या मार्गदर्शनाखाली करण्यात आली. स्थानिक गुन्हे शाखा आणि पाळधी दूरक्षेत्रातील पोलिसांनी एकत्रितपणे ही कारवाई यशस्वी केली.
