जळगाव, (प्रतिनिधी) : विद्यार्थ्यांसाठी सातत्याने नवनवीन उपक्रम राबवणाऱ्या विवेकानंद प्रतिष्ठान संचालित शानबाग विद्यालयात महाराष्ट्राचे आराध्य दैवत श्री विठ्ठल आणि पंढरपूर वारीचे महत्त्व अधोरेखित करणारी ‘गाईड’ ही एकांकिका नुकतीच सादर करण्यात आली. नाट्यरंग जळगाव निर्मित या एकांकिकेच्या सादरीकरणाने विद्यार्थी आणि विद्यार्थिनींनी पंढरपूर वारीचे आध्यात्मिक आणि सांस्कृतिक महत्त्व अनुभवले.
अमोल संगीता अरुण यांनी या एकांकिकेचे लेखन आणि दिग्दर्शन केले होते. सुहास दुसाने आणि अथर्व रंधे या कलावंतांनी आपल्या अभिनयाने बालप्रेक्षकांना मंत्रमुग्ध केले. एकांकिकेला पियुष भुक्तार यांचे पार्श्वसंगीत लाभले होते, तर दिशा ठाकूर यांनी रंगभूषा व वेशभूषा केली होती. सुयोग राऊत आणि दर्शन गुजराथी यांनी रंगमंचाची उत्तम व्यवस्था सांभाळली.
या नाट्यप्रयोगातून विद्यार्थ्यांना अध्यात्म आणि श्रद्धेचा भावस्पर्शी अनुभव घेता आला. एकांकिका सादरीकरणानंतर विद्यार्थ्यांनी उत्स्फूर्तपणे आपल्या प्रतिक्रिया दिल्या. त्यांनी एकांकिकेतील आशय, भक्तीभाव आणि सादरीकरणाच्या सौंदर्याचे कौतुक केले. शालेय स्तरावर अशा कलाकृती विद्यार्थ्यांच्या मनोवृत्तीवर सकारात्मक प्रभाव टाकतात, हे या प्रसंगी पुन्हा एकदा सिद्ध झाले.
