जळगाव, (प्रतिनिधी) : शहरातील महादेव मंदिरातील चांदीचा मुकुट आणि इतर दागिन्यांच्या चोरीचा छडा एमआयडीसी पोलिसांनी अवघ्या ४८ तासांत लावला आहे. या प्रकरणी दोन आरोपींना अटक करण्यात आली असून, त्यांच्याकडून चोरीला गेलेला सर्व मुद्देमाल हस्तगत करण्यात आला आहे.
जळगाव शहरातील एमआयडीसी पोलीस स्टेशन हद्दीतील मुकुंद नगर, लाठी शाळेमागे असलेल्या मानेश्वर महादेव मंदिरातून चांदीचा मुकुट आणि दागिने चोरीला गेल्याची घटना ११ जुलै ला उघडकीस आली होती. मंदिराच्या पिंडीवर असलेले चांदीचे मुकुट आणि दागिने अरुण लक्ष्मण शेटे यांच्या घरी ठेवलेले होते. सण-उत्सवावेळी ते मंदिरात पिंडीला लावले जात असत. फिर्यादी अरुण शेटे हे कुटुंबासह पुणे येथे मुलाकडे गेले असता, अज्ञात चोरट्यांनी घरातून ६१,५०० रुपये किमतीचे चांदीचे मुकुट आणि दागिने चोरून नेले होते. याबाबत एमआयडीसी पोलीस ठाण्यात गुन्हा दाखल करण्यात आला होता.
पोलिसांनी तपासाची चक्रे वेगाने फिरवत, सीसीटीव्ही फुटेजमध्ये दिसलेल्या चेहऱ्यांवरून आरोपींना ताब्यात घेतले. शाकीब शेख ताजुद्दीन शेख (वय २४, रा. प्लॉट नं. १०, रोकडे कॉम्प्लेक्सजवळ, कासमवाडी, जळगाव) आणि राहुल शेखर रावळकर (वय ३२, रा. जाखनी नगर, कंजरवाडा, जळगाव) अशी अटक केलेल्यांची नावे आहेत. पोलिसांनी त्यांची कसून चौकशी केली असता, त्यांनी त्यांच्या साथीदारासोबत चोरी केल्याची कबुली दिली. चोरीला गेलेला सर्व मुद्देमाल जप्त करण्यात आला आहे.
ही कौतुकास्पद कामगिरी पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि पोलीस उपअधीक्षक संदीप गावीत यांच्या मार्गदर्शनाखाली, तसेच पोलीस निरीक्षक बबन आव्हाड यांच्या सूचनेनुसार, पोउपनि राहुल तायडे, पोउपनि चंद्रकांत धनके यांच्या नेतृत्वाखाली प्रदीप चौधरी, गिरीश पाटील, रतन गिते, गणेश ठाकरे, नितीन ठाकूर, आणि राहुल घेटे यांनी केली. या गुन्ह्याचा पुढील तपास पोहेकॉ गिरीश पाटील आणि पोकॉ योगेश घुगे हे करत आहेत.
