जळगाव, (प्रतिनिधी) : गंधार कला मंडळ आणि म्हाळस परिवाराच्या वतीने येत्या गुरुवार, २६ जून रोजी “बालगंधर्व एक नक्षत्र” या विशेष मैफिलीचे आयोजन करण्यात आले आहे. बालगंधर्वांच्या जयंतीनिमित्त आयोजित ही मैफिल जळगावातील संगीतप्रेमींसाठी एक पर्वणी ठरणार आहे.
या मैफिलीत पाचोरा येथील युवा गायिका सिद्धी आणि धनश्री कुलकर्णी या भगिनी आपली कला सादर करतील. त्या शास्त्रीय संगीतासह बालगंधर्वांची काही अजरामर नाट्यगीते आणि अभंग गाऊन मैफिलीला चार चाँद लावतील. सिद्धी आणि धनश्री या दोघीही संगीत विशारद करत असून त्यांना अनेक पुरस्कारांनी सन्मानित करण्यात आले आहे. विशेष म्हणजे, धनश्रीने एका स्पर्धेत देशातून प्रथम क्रमांक पटकावून गोल्डन ट्रॉफी आणि ५०,००० रुपयांचे बक्षीस जिंकले आहे.
ही मैफिल गुरुवारी सायंकाळी ५ वाजता बळीराम पेठेतील हेमंत म्हाळस, आसरा संकुल, बळीराम मंदिराजवळ येथे होणार आहे. विशेष म्हणजे, ज्या ठिकाणी बालगंधर्वांनी त्यांच्या प्राथमिक शिक्षण घेत असताना त्यांचे मामा आबासाहेब म्हाळस यांच्या निवासस्थानी गायनाचे धडे गिरवले होते, त्याच ऐतिहासिक ठिकाणी ही मैफिल आयोजित करण्यात आली आहे.
गंधार कला मंडळ आणि म्हाळस परिवाराने जळगावातील सर्व संगीत रसिकांना या मैफिलीला उपस्थित राहण्याचे आवाहन केले आहे.
