जळगाव, (प्रतिनिधी) : जळगाव तालुक्यातील दापोरा गावात विनयभंगाचा जाब विचारण्यासाठी गेलेल्या तरुणीच्या नातेवाईकावर चाकूहल्ला झाल्याची धक्कादायक घटना घडली आहे. या हल्ल्यात तरुणीचा मामा गंभीर जखमी झाला असून त्याला रुग्णालयात दाखल करण्यात आले आहे. याप्रकरणी जळगाव तालुका पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, दापोरा येथील एक कुटुंब रात्री आपल्या घराच्या गच्चीवर झोपले होते. त्यावेळी कुटुंबातील तरुणीने आरडाओरडा केल्याने सर्वांना जाग आली. तेव्हा संशयित आरोपी विनोद अरुण सोनवणे घटनास्थळावरून पळून जाताना दिसला. झोपेत असताना कोणीतरी आपल्या पायाला स्पर्श करत असल्याचे जाणवल्याने जाग आली असता विनोद सोनवणे पायाजवळ उभा असल्याचे तरुणीने सांगितले.
या घटनेनंतर, पीडित तरुणीचे कुटुंबीय विनोद सोनवणे याच्या घरी जाब विचारण्यासाठी गेले. त्यावेळी विनोदने त्यांना शिवीगाळ करत मारहाण करण्यास सुरुवात केली. कुटुंबातील इतर सदस्य मदतीला धावले असता, विनोदने घरातून चाकूसारखे धारदार हत्यार आणले आणि तरुणीच्या मामाच्या पोटात खुपसले. तसेच, त्याच्या उजव्या खांद्यावरही वार केले.
या हल्ल्यात मामा गंभीर जखमी झाला असून त्याला तात्काळ जळगाव येथील खाजगी रुग्णालयात उपचारासाठी दाखल करण्यात आले आहे. आरोपी विनोद सोनवणे याच्या विरोधात गुन्हा दाखल करण्यात आला असून पोलीस अधिक तपास करत आहेत.
