जळगाव, (प्रतिनिधी) : जळगाव तालुक्यातून एक अत्यंत धक्कादायक प्रकार समोर आला आहे, जिथे एका अल्पवयीन मुलीशी दोनदा बळजबरीने लग्न लावून तिच्या इच्छेविरुद्ध शारीरिक संबंध ठेवण्यात आले. या गंभीर घटनेमुळे जिल्ह्यात खळबळ उडाली आहे. या प्रकरणी नशिराबाद पोलिस ठाण्यात बलात्कार आणि पोक्सो कायद्यांतर्गत ९ संशयित आरोपींविरोधात गुन्हा दाखल करण्यात आला आहे.
मिळालेल्या माहितीनुसार, संबंधित मुलगी अल्पवयीन असल्याची माहिती आरोपींना होती. असे असतानाही, त्यांनी संगनमत करून तिचे दोन वेगवेगळ्या व्यक्तींशी दोन वेळा लग्न लावले. विशेष म्हणजे, या दोन्ही लग्नांना मुलीची आई आणि भाऊ यांच्यासह इतरही संशयित आरोपी उपस्थित होते. लग्नानंतर दोन आरोपींनी पीडित अल्पवयीन मुलीच्या इच्छेविरुद्ध तिच्याशी शारीरिक संबंध ठेवले, तर काहींनी तसा प्रयत्न केला.
या गंभीर तक्रारीची दखल घेत नशिराबाद पोलिस स्टेशनचे सहाय्यक पोलिस निरीक्षक ए. सी. मनोरे यांनी तातडीने गुन्हा दाखल केला आहे. या प्रकरणाचा पुढील तपास पोलिस उपनिरीक्षक विजय कोळी करत आहेत. या घटनेमुळे समाजात संतापाची लाट उसळली असून, आरोपींना कठोर शिक्षा देण्याची मागणी होत आहे.
