जळगाव, दि. 26 – उत्तर महाराष्ट्रातील विश्वासाचं नातं जपणारे नेवे ब्रदर्स या ग्रंथ दालनास एकशे पंचवीस वर्षे पूर्ण झाल्याने, त्याच बरोबर नेवे ब्रदर्सचे संचालक शिवरत्न दादा नेवे यांचा 71 वा वाढदिवस अनोख्या पद्धतीने जळगावात बुधवारी साजरा करण्यात आला. कार्यक्रमाच्या सुरुवातीला माजी विधानसभा अध्यक्ष अरुणभाई गुजराथी यांच्यासह मान्यवरांच्या हस्ते दीपप्रज्वलन करण्यात आले. तसेच संदीप आणि संग्राम जोशी यांनी दादा नेवे यांच्या वाढदिवसानिमित्त शुभेच्छापर पोवाडा सादर केला.
दादांनी दिलेल्या शिकवणीची आठवण करून देत दादांचा व्यासंग मी देखील पुढे नेणार असल्याची ग्वाही दादा नेवे यांचे चिरंजीव जयवर्धन नेवे यांनी प्रास्ताविकात बोलताना दिली. शिवचरित्राचे अभ्यासक दादा नेवे यांनी सव्वाशे वर्षापासून सुरू असलेल्या आपल्या पुस्तक, साहित्य, ग्रंथ विक्री व्यवसायाच्या माध्यमातून आता पर्यंत अनेकांना ज्ञानार्जनाची संधी उपलब्ध करून दिली. त्यामुळे दादा नेवे यांच्या 71 व्या वाढदिवसानिमित्त त्यांची ग्रंथतुला करण्यात आली. तसेच नेवे यांच्या पाचव्या पिढीचा नामकरण सोहळा देखील करण्यात आला.
याप्रसंगी माजी विधानसभा अध्यक्ष अरुणभाई गुजराथी यांनी शुभेच्छापर मनोगत व्यक्त केले. यावेळी महापौर जयश्री महाजन, आमदार सुरेश भोळे, जैन उद्योग समुहाचे अध्यक्ष अशोक जैन, जळगाव पीपल बँकेचे माजी चेअरमन भालचंद्र पाटील, माजी उपमहापौर रमेश जैन, माजी महापौर नितीन लढ्ढा, विष्णू भंगाळे, करीम सालार, आदींसह नेवे परिवारातील नातेवाईक, आप्तेष्ट मंडळी उपस्थित होते.
