जळगाव, (प्रतिनिधी) : तालुक्यातील कुसुंबा येथील गोशाळेजवळ पायी जात असलेल्या एका वृद्ध पुजाऱ्याला अज्ञात भरधाव रिक्षाने मागून जोरदार धडक दिल्याने त्याचा मृत्यू झाल्याची धक्कादायक घटना सोमवारी दि. २४ फेब्रुवारी रोजी सकाळी ११. ३० वाजता घडली आहे. याप्रकरणी एमआयडीसी पोलीस स्टेशनला गुन्हा दाखल करण्याचे काम सुरु होते.
मनोहर बाबुराव जोशी (वय ८१, रा. साई सिटी कॉलनी, कुसुंबा, जळगाव) असे मयत वृद्ध पुजाऱ्याचे नाव आहे. ते गावात पत्नी, मुलगा, सून, नातवंडे यांच्यासह राहत होते. कुसुंबा येथील शंकर पार्वती मंदिरात पुजारी म्हणून ते सेवा करीत होते. दरम्यान, सोमवारी दि. २४ रोजी सकाळी ११. ३० वाजता मनोहर जोशी हे गोशाळेजवळून पायी जात होते. तेव्हा अचानक अज्ञात रिक्षाने त्यांना मागून धडक देऊन पसार झाल्याची माहिती ग्रामस्थांनी दिली. जखमी मनोहर जोशी यांना तत्काळ उपचारासाठी शासकीय वैद्यकीय महाविद्यालय व रुग्णालयात आणले असता वैद्यकीय अधिकाऱ्यांनी तपासून मयत घोषित केले.
यावेळी कुटुंबीयांनी एकच आक्रोश केला. दरम्यान, महाशिवरात्रीच्या आधीच भगवान महादेवाची सेवा करणाऱ्या पुजारीबाबांचे निधन झाल्याने गावात शोककळा पसरली आहे. घटनेप्रकरणी एमआयडीसी पोलीस स्टेशनला गुन्हा दाखल करण्याचे काम सुरु होते.
