जळगाव, (प्रतिनिधी) : राष्ट्रसंत गाडगे महाराज यांच्या जयंतीनिमित्त शहरातील संत गाडगे बाबा शहरी बेघर निवारा केंद्र येथे आरोग्य शिबिर व स्वच्छता अभियान कार्यक्रमाचे आयोजन करण्यात आले.
यावेळी डॉ.परीक्षित बाविस्कर, मुक्ती फाउंडेशनचे अध्यक्ष मुकुंद गोसावी, मनपाच्या शहर अभियान व्यवस्थापक गायत्री पाटील, जिल्हा रुग्णालय मानसिक आरोग्य विभागाचे दौलत निमसे यांच्या शुभहस्ते गाडगे महाराज यांची प्रतिमा पूजन सोबत झाडू पूजन करत स्वच्छता करण्यात आली.
दरम्यान राष्ट्रसंत गाडगे महाराज यांचे विचार, सेवाकार्य, अंधश्रद्धा निर्मूलन, स्वच्छता अभियान यावर मुक्ती फाउंडेशनचे मुकुंद गोसावी यांनी माहिती दिली. तर समयोचितपर डॉ. परीक्षित बाविस्कर, गायत्री पाटील, दौलत निमसे यांनीही आपले मनोगत मांडले.
निवारा केंद्रातील ज्येष्ठांसाठी मोफत आरोग्य शिबिरात मार्गदर्शन, आरोग्य तपासणी डॉ.परिक्षीत बाविस्कर, डॉ.शाहरुख खान आदींनी करून शक्तीवर्धक, हाडांच्या मजबुती तसेच उच्च रक्तदाब असलेल्यांना औषधी दिल्या.
कार्यक्रमाचे सूत्रसंचालन निवारा केंद्राचे व्यवस्थापक मनोज कुलकर्णी यांनी तर आभार समाजकार्य महाविद्यालयाच्या काजल चौधरी यांनी केले. कार्यक्रमास काळजीवाहक राजेंद्र मराठे, हर्षल वंजारी, शितल काटे, समाजकार्य महाविद्यालयच्या अश्विनी बिलकूले, रेवती चौधरी, साक्षी मोरे, तेजस चव्हाण, राजेंद्र कोळी, वैभव निकुंभ यांनी परिश्रम घेतले.
