जळगाव, (प्रतिनिधी) : शहरातील नवीपेठ भागात ३ मजली इमारतीत लिफ्ट बसविण्यात आली होती दरम्यान लिप्टचे टेस्टींग करत असतांना अचानक वायर रोप तुटल्याने अपघात होऊन जखमी झालेल्या व्यावसायिकाचा उपचारादरम्यान मृत्यू झाल्याची घटना नवीपेठ येथील प्रकाश सायकल मार्ट येथे बुधवारी ५ फेब्रुवारी रोजी सायंकाळी ६ वाजेच्या सुमारास घडली आहे. याप्रकरणी जळगाव शहर पोलीस ठाण्यात अकस्मात मृत्यूची नोंद करण्यात आली आहे.
राजकुमार प्रकाश दर्डा (वय ४६, रा. मोहाडी रोड, जळगाव) असे मयत व्यावसायिकाचे नाव आहे. त्यांच्या पश्चात पत्नी, दोन मुले आणि मुलगी असा परिवार आहे. मोहाडी रोड परिसरात राजकुमार दर्डा हे सायकलचा व्यावसाय करून ते उदरनिर्वाह करत होते. त्यांचे नवीपेठ येथे तीन मजली इमारतीत लिप्ट बसविण्याचे काम सुरू होते. दरम्यान लिप्टचे काम पुर्ण झाल्यानंतर लिप्ट कर्मचारी आणि राजकुमार दर्डा हे बुधवारी ५ फेब्रुवारी रोजी सायंकाळी ६ वाजता लिफ्ट टेस्टिंग करत होते. त्यावेळी अचानक लिप्टमधील रोपवायर तुटल्याने लिफ्ट कोसळली.
त्यात राजकुमार दर्डा हे गंभीररित्या जखमी झाले. त्यांना तातडीने खासगी रूग्णालयात दाखल केले असता रात्री १२ वाजता त्यांचा उपचारादरम्यान मृत्यू झाला. यातील सोबत असलेला कर्मचारी किरकोळ जखमी झाला आहे. याबाबत जळगाव शहर पोलीस ठाण्यात अकस्मात मृत्यूची नोंद करण्यात आली. पुढील तपास पोहेकॉ रविंद्र सोनार हे करीत आहे.
