जळगाव, (प्रतिनिधी) : शहरातील शिव कॉलनी जवळील रेल्वे उड्डाणपुलावर अज्ञात अवजड वाहनाने दुचाकीस्वार वृद्धाला चिरडल्याची धक्कादायक घटना गुरुवारी १६ जानेवारी रोजी दुपारच्या सुमारास घडली आहे. घटनास्थळी पोलिसांनी धाव घेतली. दरम्यान पंचनामा करून मृतदेह शासकीय वैद्यकीय महाविद्यालय व रुग्णालयात हलविण्यात आला.
भारमल कौतिक पाटील (वय ६५, रा. वैजनाथ ता. एरंडोल) असे मयत वृद्धाचे नाव आहे. शहरातील खोटे नगरकडून जळगाव शहरात दुचाकीस्वार वृद्ध भारमल पाटील हे त्यांची दुचाकी क्रमांक (एमएच १९ बी डब्ल्यू २७३०) ने जळगाव शहरात येत असताना शिवकॉलनी जवळील रेल्वे उड्डाणपुलावर अवजड वाहनाने त्यांच्या दुचाकीला मागून जोरदार धडक दिली. या अपघातात दुचाकीस्वार असलेले वृद्ध हे अवजड वाहनाच्या चाकाखाली आल्याने जागीच ठार झाले.
ही घटना घडल्यानंतर जिल्हापेठ पोलिसांनी घटनास्थळी धाव घेतली. मयत झालेल्या वृद्धाच्या नातेवाईकांनी शासकीय वैद्यकीय महाविद्यालय येथे धाव घेऊन एकच आक्रोश केला. या संदर्भात पोलीस स्टेशनला नोंद घेण्याचे काम सुरू होते.
